ءومىردىڭ قيىندىقتارىنان شىعۋدىڭ جولى

 نۇر-سۇلتان. قازاقپارات - رەينولدس دودسوننىڭ تىعىرىقتان جول تابۋ جونىندەگى كەڭەستەرى:

1. ويداعىداي بولار دەپ ويلا، ءبىراق ويداعىداي بولماي قالاتىن جاعدايعا دايىندال.

مۇندايعا ىشتەي الدىن الا ءازىر ادام تەز وڭالادى. تىعىرىققا تىرەلەتىن جاعدايدى باجايلاۋدىڭ امالى: باسىڭا كۇن تۋاتىن اۋىر احۋالداردى ويشا وتكەرۋ. بۇل تۇيىققا تىرەلگەن ءساتتىڭ كەساپاتىنان امان- ساۋ وتۋىڭە كەپىلدىك بەرەدى.

2. ارەكەت جاساماس بۇرىن اۋەلى بۇل ءىسىڭنىڭ پايدا-زيانىن وي ەلەگىنەن وتكىز. اسىعىستىق ارانداتۋى مۇمكىن. باتىل ارەكەتكە بارماس بۇرىن اسىقپاي ويلانۋ قاجەت.

3. اقىرى تاۋەكەلگە بەل بۋعان ەكەنسىڭ، ەندى ەشتەڭەگە الاڭداما.

4. ورايى كەلىپ جاتسا جاردەم سۇراۋدان دا جالتارما. ادەتتە وسىنداي ءومىر وتكەلدەرىنەن وتكەن ادامداردىڭ قولعابىس- كومەگى ارقاسىندا عانا ويداعىداي ناتيجەگە قول جەتەدى. جەكە- دارا قيمىلداۋعا تالاپ قىلعاندار تاۋداي قيىندىقتارعا جولىعادى.

5. بولماشى نارسەلەرگە الدانىپ، شىرماتىلا بەرمە. بىرىنەن سوڭ ءبىرى تۋىنداپ جاتقان شۇعىل ماسەلەلەردى شەشۋ ۇستىندە ەڭ باستى ماقساتىڭدى ەكى ەلى ەستەن شىعارما.

6. قانداي قيىن جاعداي تۋماسىن، شىنشىل بول. قيىن تۇيىنگە كىنالى ءوزىڭ بولعان شاقتاردا جالعان سويلەپ، جالتارۋعا نەمەسە جىلى جاۋىپ قويۋعا قۇشتارلىق ويانۋى دا مۇمكىن. اقتالۋدىڭ ۇيات ەكەنى ءوز الدىنا، پالەندەي پايداسى دا جوق. شىندىق اقىرى انىقتالعان كەزدە جالعان ءسوزدىڭ زاردابى العاشقى اعات ىستەن الدەقايدا زور زيان اكەلۋى مۇمكىن.

7. ۇنەمى «ويداعىداي بولار» دەپ ۇمىتتەن. قيىن تۇيىندەر -  الدەقاشان ءپىسىپ- جەتىلگەن ماسەلەنى شەشۋدەن ەندى شەگىنەرگە جول قالماعانىنىڭ كورىنىسى. داعدارىس وزگەرىس جاساۋعا يتەرمەلەيدى.

حالقىمىزدا: «كىمنىڭ باي بولعىسى كەلمەيدى - قۇدايى قالامايدى، كىمنىڭ باتىر بولعىسى كەلمەيدى - جۇرەگى داۋالامايدى»، - دەگەن ءسوز بار. تىعىرىققا تىرەلگەن شاقتاردا قانداي قيىن احۋالعا تاپ بولعانىڭمەن، مۇنىڭ ءوزى ساعان جاڭا مۇمكىندىكتەر بەرەتىنىن جادىڭدا ۇستا. ۇتىلساڭ، مۇنىڭ ءبارى بولاشاعىڭا ساباق. ۇتىپ شىقساڭ - بۇل ومىردەگى ەڭ ۇلكەن جەڭىسىڭ بولۋى دا ىقتيمال.