تەپۋي - جوعالعان الەم
نۇر- سۇلتان. قازاقپارات - ۆەنەسۋەلانىڭ وڭتۇستىك- شىعىسىندا جەر بەتىندەگى ەڭ كەرەمەت مەكەندەردىڭ ءبىرى ورنالاسقان. ساۆاننا مەن دجۋنگليدىڭ قورشاۋىندا، كوزدەن تاسا جاتقان ايماقتىڭ فلوراسى مەن فاۋناسىنىڭ ءوزى قۇرمەتكە لايىق.
تەپۋي - وڭتۇستىك امەريكانىڭ گۆيان اتتى تاۋلى قىراتتارىندا جاتقان تەگىس تاۋلار جۇيەسى. ولار الىپ شوقىلاردىڭ قۇلاۋ ناتيجەسىندە پايدا بولعان. بۇل شوقىلار سوناۋ وڭتۇستىك امەريكا مەن افريكانىڭ بولىنبەگەن داۋىرىندە، ياعني، 200 ميلليون جىل بۇرىن پايدا بولعان. ولار اتلانت مۇحيتى جاعالاۋىنان ورينوكو، امازونكا، ريۋ- نەگرۋ وزەندەرىنە دەيىن جالعاسىپ جاتقان كورىنەدى. ەروزيا مەن جاۋىن- شاشىن اسەرىنەن بۇگىندە وسىنداي تاڭعاجايىپ تاۋلار پايدا بولىپ وتىر.
اڭگىمەمىزگە ارقاۋ بولىپ وتىرعان مەكەنگە ءبىر كەزدەرى وسى جەردە تىرشىلىك ەتكەن ءۇندىس تايپالارى "تەپۋي" دەگەن اتاۋ بەرگەن ەكەن. "تەپۋي" ءسوزى گران سابانا جەرىن مەكەندەيتىن پەمون تايپالارىنىڭ تىلىندە "قۇداي ءۇيى" دەگەن ماعىنانى بىلدىرەدى. عالىمدار اتاۋدى ولاردىڭ وتە بيىك بولۋىمەن بايلانىستىرادى. ءاربىر تەپۋي جەكە تاۋ سانالادى جانە بىرىنشىسىندە كەزدەسەتىن وسىمدىك باسقالارىندا مۇلدە ۇشىراسپايدى.
بۇل جەردىڭ ەڭ تەرەڭ جەرى - «Abismo Guy Collet» ۇڭگىرى. ونىڭ تەرەڭدىگى 671 مەترگە جەتەدى. ال ەڭ ادەمى تەپۋي رەتىندە اۋتانانى اتاۋعا بولادى، ورمان اراسىنىن بوي كوتەرىپ تۇرعان اۋتانا جارتاستارىنىڭ ەڭ بيىگى 1300 مەتر. ساريسارينياما تاۋى دا باسقالاردان ەرەكشەلەنەدى، مۇندا 100 مەترگە دەيىن جەتەتىن دوڭگەلەك تەسىكتەر وتە كوپ كەزدەسەدى ەكەن. تاعى دا ءبىر تانىمال تەپۋي اۋيانتەپۋي اتالادى، بىلە بىلسەڭىز، مۇندا الەمدەگى ەڭ بيىك انحەل سارقىراماسى ورنالاسقان. جالپى، مۇنداعى ەڭ ۇلكەن تەپۋي 3000 مەترگە جەتەدى. ءۇش قانا تاۋعا جاياۋ شىعۋعا بولادى، ونىڭ ءبىرى - بيىكتىگى 2180 مەتر بولاتىن رورايما تاۋى.
بۇل تاۋ 1884 -جىلعا دەيىن مۇلدە تانىس ەمەس بولىپ كەلگەن ەدى. شوتلانديالىق قالامگەر ارتۋر كونان رورايما تاۋىنان ەرەكشە اسەر الىپ، "جوعالعان الەم" اتتى رومان جازعان ەكەن. تەپۋيلار ءبىر قاراعاندا قۇلازىپ جاتقانداي بولىپ كورىنگەنىمەن، وندا تىرشىلىك قايناپ جاتىر. ۇستىڭگى جاعىندا ءجيى جاڭبىر جاۋىپ، سالقىن بولىپ تۇرعانىمەن، تومەنگى ايماعىندا تروپيكالىق كليمات پاتشالىق قۇرعان، كوبىنە جىلى بولىپ تۇرادى. جالپى ۆەنەسۋەلاعا تيەسىلى 9400 وسىمدىكتىڭ 2322 ءسى وسى مەكەندە. ءاربىر ساياحات سۇيەر قاۋىمنىڭ ارمانى - تەپۋيلاردىڭ شىڭىنا شىعىپ، تۇمان اراسىنان ەرەكشە بولىپ كورىنەتىن كۇن شىعىستى تاماشالاۋ.. .
Massaget.kz