ۇيىقتامايتىن ادام
ءيا، ومىردە ءسىز قۇشاعىنان بوساي الماي جۇرگەن ۇيقىنى ءبىرجولا ۇمىتقان ادام بار ەكەن. اڭگىمەمىزگە ارقاۋ بولىپ وتىرعان پلانەتامىزداعى ەڭ تاڭقالارلىق ءارى ەرەكشە جان گەرمانياداعى گاللە قالاسىندا تۇرادى. ونىڭ ەسىمى - ياكوۆ تسيپەروۆيچ. ونىڭ تاريحى بىلاي باستالادى: 1979 -جىلى بۇل كىسى قاتتى ۋلانىپ قالىپ، كلينيكالىق ءولىم اۋزىنا تاپ بولادى. كلينيكالىق ءولىم شامامەن ءبىر ساعاتقا سوزىلىپ كەتەدى. جالپى كلينيكالىق ءولىم - مىڭداعان ادامدار باستان كەشىرىپ جاتاتىن قالىپتى قۇبىلىس. رەيموند موۋديدىڭ بۇل جايلى «ومىردەن كەيىنگى ءومىر» دەگەن ەڭبەگى بار. ءبىراق، ياكوۆتىڭ جاعدايى تاڭقالارلىق ەدى.
ادەتتە كلينيكالىق ءولىمنىڭ ۇزاقتىعى 5 مينۋتقا سوزىلىپ، ودان ارمەن مي قىرتىستارىنىڭ تامىرلارى ءولىپ، ادام ماڭگى ولىمگە كەتەدى. ال ياكوۆتىڭ ءولىمى - 1 ساعاتقا ۇزاپ، كوزىن اشقاننان كەيىن ءبىر اپتا بويى وزىنە كەلە الماي جۇرەدى. بارىنەن دە تۇسىنىكسىز بولعاندىعى، بۇل ادام ۇيىقتاۋ قابىلەتىن جوعالتىپ الادى، ۇيىقتاي الماعاندىعى بىلاي تۇرسىن، مۇلدە جاتىپ تىنىعا المايتىن جاعدايعا جەتەدى. ەندى عانا جانتايا بەرگەندە، بەيمالىم كۇش ونى جوعارىعا قاراي لاقتىرىپ تاستايدى ەكەن. بۇل وقيعا 16 جىلعا دەيىن جالعاسادى.
ون التى جىل بويى جىگىت مۇلدە كوز ىلمەگەن. ەڭ مىقتى دارىگەر مامانداردىڭ ءوزى "كەسەلدىڭ" سەبەبىن دە، ەمىن دە تابا المادى. 1995 -جىلدان باستاپ ول يوگامەن اينالىسا باستايدى. شىعىستىق مەديتاتسيالارمەن جاقىن تانىسىپ، ءوز- ءوزىن قولعا الادى. ناتيجەسىندە كۇنىنەن 2-3 ساعات كوز ىلۋگە مۇمكىندىك الادى. ءبىر قىزىعى، وسى جىلدارى ياكوۆ تسيپەروۆيچتىڭ سىرت كەلبەتى مۇلدە وزگەرمەگەن. قازىر ونىڭ جاسى 51 ءدى القىمدادى. الايدا وعان قاراپ جيىرما بەسكە ەندى كەلگەن دەگەن ويدا قالاسىز. 1979 -جىلعى كلينيكالىق ولىمنەن كەيىن ونىڭ تەمپەراتۋراسى 34 گرادۋستان كوتەرىلمەي قالعان. زەرتتەۋشى- ماماندار ونىڭ جاستىعىنىڭ سەبەبىن وسى تومەن تەمپەراتۋرامەن بايلانىستىرادى. جالپى، قازىرگە دەيىن ياكوۆ تسيپەروۆيچ تاپ بولعان جاعداي تۋرالى عىلىمدا ناقتى زەرتتەلگەن ەشتەڭە جوق بولىپ تۇر.
Massaget.kz