قازاقستاندا اۆتوبۋستاردىڭ جىلدامدىعىن تومەندەتپەك

 نۇر- سۇلتان. قازاقپارات - قازاقستاندا جولاۋشىلار اۆتوبۋسىنىڭ جىلدامدىعىنا قاتىستى شەكتەۋ قويۋ ۇسىنىلدى. بۇل تۋرالى اكىمشىلىك پوليتسيانىڭ كوميتەت ءتوراعاسى ماقسات بايبولوۆ ءى ءى م- ءنىڭ بريفينگىندە ايتتى.

 "ءى ءى م يندۋستريا جانە ينفراقۇرىلىمدىق دامۋ مينيسترلىگىمەن بىرلەسە وتىرىپ جولاۋشىلار تاسىمالىندا قاۋىپسىزدىكتى ارتتىرۋ بويىنشا جول كارتاسىنىڭ جوباسىن ازىرلەدى. كەشەندى شارالار قاراستىرىلۋدا. بۇل ەسكى اۆتوبۋستاردىڭ پايدالانىلۋىنا شەكتەۋ قويۋعا دا بايلانىستى. ءوز كەزەگىندە ول اۆتوبۋستار پاركىن جاڭارتۋعا مۇمكىندىك بەرەدى. قازاقستاندا 90 مىڭنان اسا ەسكى اۆتوبۋس تىركەلگەن"، - دەيدى بايبولوۆ.

 سونىمەن قاتار، مەملەكەتتە تاسىمالداۋشىلار، اۆتوبۋس جۇرگىزۋشىلەرىنە قويىلاتىن تالاپتاردى قاتاڭداتىپ، اۆتوبۋستىڭ قايتا جابدىقتالۋىنا تىيىم سالۋ جوسپارلانۋدا.

 "ەلدى مەكەندەردە اۆتوبۋستاردىڭ جىلدامدىعىن ساعاتىنا 50 شاقىرىمعا دەيىن، قالا سىرتىنداعى تاسجولداردا 80 شاقىرىمعا دەيىن شەكتەۋ قاراستىرىلۋدا. بۇگىندە ەلدى مەكەندەردە جوعارى جىلدامدىق ساعاتىنا 60 شاقىرىمنان، قالا سىرتىنداعى تاسجولداردا 90 شاقىرىمنان اسپاۋى ءتيىس"، - دەيدى كوميتەت ءتوراعاسى.