قازاقستان مەكتەپتەرىنە جاڭا ءپان ەنگىزىلەدى

ەرەسەك سىنىپ وقۋشىلارىن كاسىپكەرلىك قىرلارىنا باۋليتىن اتالمىش ءپان 2019 -جىلدىڭ 1 - قىركۇيەگىنەن باستاپ قازاقستان مەكتەپتەرىنىڭ بارلىعىندا 10-سىنىپتان باستاپ ەنگىزىلمەك.

 «2017-2018 -جىلداردا قازاقستاننىڭ 17 وڭىرىندە «كاسىپكەرلىك جانە بيزنەس نەگىزدەرى» ءپانىن وقىتاتىن ىلكى مەكتەپتەردىڭ ءتىزىمى جاسالعان بولاتىن. الماتىدا ى. التىنسارين اتىنداعى №159 گيمنازيا جاڭا ءپاندى سىناقتان وتكىزدى. قاناتقاقتى ءپان وقۋشىلاردىڭ كاسىپكەرلىك الىپپەسىن مەڭگەرۋىنە سەپتىگىن تيگىزدى. وقۋشىلار بىرنەشە بيزنەس- جوبانى ءساتتى قورعاپ، جۇلدەلى ورىندار دا الىپ ۇلگەردى» ، - دەيدى ءبىلىم وشاعىنىڭ ديرەكتورى ەلميرا بيدايبايەۆا.

جاڭا ءپاندى «اتامەكەن» ۇلتتىق كاسىپكەرلەر پالاتاسى ۇسىنىپ وتىر.

 «2019 -جىلى كەز كەلگەن 10- سىنىپ وقۋشىسى وسى ءپاندى تاڭداي الادى. ياعني، «كاسىپكەرلىك جانە بيزنەس نەگىزدەرى» ەرىكتى پاندەر قاتارىنا جاتقىزىلىپ وتىر. وقۋ باعدارلاماسىندا ول اپتاسىنا 2 رەت، جالپى سانى 68 ساعات بەرىلەدى. ءپاننىڭ ءوزى تەوريالىق جانە پراكتيكالىق ساباقتاردان تۇرادى. جاڭا ءپان وقۋشىلاردىڭ بيزنەسكە يكەمىن ارتتىرىپ، ەكونوميكالىق تەرميندەردى ءبىلىپ وسۋىنە، بيزنەس سالاسىنداعى قۇقىقتىق نەگىزدەردى ەركىن مەڭگەرۋىنە باعىتتالادى» ، - دەيدى الماتى قالاسى بويىنشا كاسىپكەرلەر پالاتاسىنىڭ ادام كاپيتالىن دامىتۋ ءبولىمىنىڭ ساراپشىسى ءاليا نۇرىشيەۆا.