اقتاۋ تۇرعىنى شەتپە ەلدى مەكەنىنىڭ ماڭىنان بەلگىسىز جانۋاردىڭ سۇيەكتەرىن تاۋىپ الدى

نۇر-سۇلتان. قازاقپارات - اقتاۋلىق ازامات شەتپە ەلدى مەكەنىنىڭ ماڭىنان بەلگىسىز جانۋاردىڭ سۇيەكتەرىن تاۋىپ الدى، دەپ حابارلايدى حابار24.kz.

ول كەزىككەن قاڭقا وسىدان 100 ميلليون جىل بۇرىن تەڭىزدە ءومىر سۇرگەن دينوزاۆر بولۋى مۇمكىن. ۆلاديمير ەسىمدى قالا تۇرعىنى ءوز جاڭالىعىن الەۋمەتتىك جەلىدە جاريالاعان. اۋەسقوي ءتۇسىرىلىمدى رەسەيلىك ساراپشىلار دا كورىپتى.

ولاردىڭ ايتۋىنشا، بۇل سۇيەكتەر يحتوزاۆرعا تيەسىلى بولۋى مۇمكىن. الايدا بۇل بولجامنىڭ راستىعى تەك ساراپتاما جۇمىستارىنان سوڭ بەلگىلى بولماق. قازىر ول بەينەتاسپانى قازاقستاندىق ماماندارعا كورسەتۋدى جوسپارلاپ ءجۇر.

«قاڭقا سۇيەكتەرى تابىلعان جەردى سىرت كوزدەن جاسىرۋدى ويلادىم. ويتكەنى ولارعا قول تيسە، كۇل بولىپ شاشىلىپ قالۋى مۇمكىن. سول ءۇشىن تەك ۇيالى تەلەفونعا ءتۇسىرىپ الىپ، الەۋمەتتىك جەلىگە جۇكتەدىم. ونى زەرتتەۋمەن ءوز ءىسىنىڭ ماماندارى جۇمىستانۋى قاجەت دەپ ويلايمىن»، - دەدى قالا تۇرعىنى ۆلاديمير يارسەۆ.