عالامتوردا اقتاۋدا ءۇش بالا ساتىلاتىنى جايلى جارناما جاريالاندى

نۇر-سۇلتان. قازاقپارات - OLX.kz سايتىنىڭ ساتىلىمدار بولىمىندە اقتاۋدا ءۇش بالا ساتىلادى دەگەن جارناما پايدا بولدى.

بۇل تۋرالى tumba.kz سايتى جازدى.

سايتتىڭ اقپاراتىنا سۇيەنسەك، حابارلاما ۇيالى تەلەفوننان 27 -مامىر كۇنى، 13:18-دە سالىنعان. ءبىراق كورسەتىلگەن ءنومىر ءسوندىرۋلى.

حابارلامانى جەرگىلىكتى تۇرعىنداردىڭ ءبىرى بايقاپ قالىپ، سايتتىڭ رەداكسياسىنا حابارلاعان. حابارلامادا ءۇش بالا ارزان باعامەن ساتىلاتىنى كورسەتىلگەن. ءتىپتى ءۇش بالانىڭ سۋرەتى دە سالىنعان.

سايتتىڭ حابارلاۋىنشا، پوليتسەيلەر بەيرەسمي سۇحبات كەزىندە الدەكىم جاي قالجىڭداماق بولعان شىعار دەپ ايتقان.

وسىدان ءبىراز ۋاقىت بۇرىن شىمكەنت تۇرعىنى ارنايى قىزمەتتەردىڭ جىلدامدىعىن بايقاپ كورۋ ماقساتىندا وسى سياقتى حابارلاما بەرگەن بولاتىن. سوندا قۇقىق قورعاۋ ورگاندارى اقپاراتتى جىلدام تەكسەرىپ، ق ر قىلمىستىق كودەكستىڭ 12-بابى («ادام ساۋداسى») بويىنشا سوتقا دەيىن تەرگەپ-تەكسەرۋ جۇرگىزىلگەن.