يلون ماسكتىڭ عالامدىق جوباسى قاشان ىسكە قوسىلادى؟
Falcon 9 كاناۆەرال مۇيىسىندەگى عارىش ايلاعىنان 24 - مامىر كۇنى نۇر- سۇلتان ۋاقىتىمەن ساعات 08:30 دا ۇشىپ، 60 جەرسەرىكتى 440 شاقىرىمدىق جەر وربيتاسىنا ءساتتى الىپ شىقتى. بۇل جەرسەرىكتەر - بۇكىل جەر پلانەتاسىن ينتەرنەت- سيگنالمەن قامتامىز ەتۋ ءۇشىن جاسالىپ جاتقان SpaceX جوباسىنىڭ ءبىر بولىگى. ەگەر ءبارى جوسپارداعىداي بولسا، جوبا اياسىندا الداعى بىرنەشە جىلدا عالامدىق جىلدام عالامتور جۇيەسى پايدا بولۋى مۇمكىن. "Starlink الەمدى سەنىمدى ءارى قولجەتىمدى جىلدام عالامتور جۇيەسىمەن جاۋلاپ الادى"، - دەلىنگەن SpaceX كومپانياسىنىڭ Twitter- دەگى مالىمدەمەسىندە. SpaceX Starlink جوباسى اياسىندا فلوريدا شتاتىنان ۇشقان Falcon 9 زىمىرانىن تىكەلەي ەفيردەن كورسەتتى. ال جەردەن ايىرىلعاننان كەيىن ءبىر ساعاتتان سوڭ اۋستراليا مەن انتاركتيدا اراسىندا زىمىراننىڭ جوعارعى ساتىسى 13600 كەلىنى قۇرايتىن 60 جەرسەرىگىن ءبىر ۋاقىتتا بوساتتى. بولاشاققا باستار باستى قادام 227 كەلىنى قۇرايتىن Starlink سەرىكتەرىنە ءبىر كۇن پانەلى مەن اقپاراتتى جەرگە جىبەرىپ، قايتا قابىلدايتىن انتەننا ورناتىلعان. ءار جەرسەرىكتە ءالسىز، الايدا اسا ءتيىمدى حولل قوزعالتقىشتارى ورناتىلعان. حولل - كريپتون گازىن بولەتىن يوندى قوزعالتقىش.
يلون ماسكتىڭ ايتۋىنشا، بۇل قوزعالتقىشتار جەرسەرىكتەرىنىڭ ءبىر- بىرىمەن سوقتىعىسىپ قالماۋىنىڭ الدىن الادى. ال قولدانۋ مەرزىمى اياقتالعاننان سوڭ ءاربىر جەرسەرىگى وربيتادان شىعىپ، ءوزىن- ءوزى جويادى. ايتا كەتۋ كەرەك، العاشقى 60 تەلەكوممۋنيكاتسيالىق جەرسەرىكتەرىندە ەڭ ماڭىزدى - لازەر ساۋلەلەرى جوق. بۇل ساۋلەلەر ءاربىر سەرىكتى وزگە ءتورت سەرىكپەن بايلانىستىرىپ، جەر اينالىسىندا ۇلكەن توردى قۇرايدى. ال بۇل ءوز كەزەگىندە جوعارى جىلدامدىعى بار عالامتوردى ورناتۋعا مۇمكىندىك بەرەدى. Starlink جوباسىنىڭ تالشىقتى- وپتيكالىق كابەلدەن ارتىقشىلىعى اقپاراتتى جەرگە %50 جىلدام بەرەدى. Starlink جوباسىنىڭ ماقساتى، 2027 -جىلعا دەيىن ءدال وسىنداي 12000 تەلەكوممۋنيكاتسيالىق جەرسەرىكتەرىن ۇشىرۋ. بۇل ءدال قازىر جەر اينالاسىنداعى عارىش اپپاراتتارىنان 7 ەسەگە كوپ. مۇنداي ناتيجەگە جەتۋ ءۇشىن SpaceX الداعى جەتى جىلدا ايىنا ءبىر رەت اسپانعا جەرسەرىكتەرىن ۇشىرىپ وتىرۋ قاجەت. دەگەنمەن يلون ماسك الەمدىك عالامتور جۇيەسىن قوسۋ ءۇشىن 1000 جەرسەرىگى جەتكىلىكتى ەكەنىن مالىمدەدى. Starlink جەردىڭ باسىم بولىگىن كەدەرگىسىز كەڭ جولاقتى عالامتورمەن قامتاماسىز ەتەدى. سونداي- اق ۇشاقتار، كەمەلەر، ءتىپتى، كولىكتەرگە دەيىن عالامتورعا قوسىلۋعا مۇمكىندىك تۋادى.
Massaget.kz