جۇمىسسىز قازاقستاندىقتاردىڭ سانى بەلگىلى بولدى

نۇر-سۇلتان. قازاقپارات - 2019-جىلعى ساۋىردە قازاقستاندا جۇمىسسىز جۇرگەن 442,5 مىڭ ادام تىركەلگەن. مۇنداي دەرەكتى ق ر  ۇ ە م ستاتيستيكا كوميتەتى جاريا ەتتى، دەپ حابارلايدى قازاقپارات ءتىلشىسى.

«2019-جىلعى ساۋىردە رەسپۋبليكا ەكونوميكاسىندا باعالاۋ بويىنشا 8,8 ميلليون ادام جۇمىسپەن قامتىلدى. ەڭبەككە تارتىلعان حالىقتىڭ اراسىندا 6,7 ميلليون ادام (جۇمىسپەن قامتىلعانداردىڭ جالپى سانىنان 76,1 پايىزى) جالدامالى ەڭبەك ەتەدى»، - دەلىنگەن كوميتەت اقپاراتىندا.

ۆەدومستۆو مالىمەتىنشە، 2019-جىلعى ساۋىردە جۇمىسسىزدار سانى باعالاۋ بويىنشا 442,5 مىڭ ادام بولدى. جۇمىسسىزدىق دەڭگەيى 4,8 پايىزدى قۇرادى.

جۇمىسپەن قامتۋ ورگاندارىندا 2019-جىلعى ءساۋىر ايىنىڭ سوڭىنا 160,7 مىڭ ادام جۇمىسسىز رەتىندە رەسمي تىركەلگەن. تىركەلگەن جۇمىسسىزدار ۇلەسى جۇمىس كۇشىنىڭ سانىنىڭ 1,8 پايىزىن قۇرايدى.

جاسىرىن جۇمىسسىزدىق دەڭگەيى 2019-جىلعى I توقساندا جۇمىس كۇشى سانىنىڭ 0,3 پايىزىنا (31,2 مىڭ ادام) تەڭ بولدى.