دەپۋتات «سىباعانىڭ» كەمشىن تۇستارىن اتادى

 نۇر- سۇلتان. قازاقپارات - ق ر پارلامەنت ءماجىلىسىنىڭ دەپۋتاتتارى اۋىل شارۋاشىلىعى مينيسترىنە ساۋال جولدادى، دەپ حابارلايدى قازاقپارات ءتىلشىسى.

دەپۋتات نۇرجان التايەۆتىڭ ايتۋىنشا، ق ر تۇڭعىش پرەزيدەنتى نۇرسۇلتان نازاربايەۆتىڭ تاپسىرماسى اياسىندا شاعىن جانە ورتا كاسىپكەرلەرگە نەسيە بەرۋدىڭ «سىباعا» اتتى باعدارلاماسى دايارلانعان بولاتىن. نەگىزگى ماقسات - مال باسىن كوبەيتۋ.

«ءسوز جوق، ونداي باعدارلاما قاجەت. ءبىراق بىلتىر وعان جاڭا تالاپتار ەنگىزىلدى. اتالعان شارتتار باعدارلامانىڭ باستاپقى ماقسات- مىندەتتەرىنە قايشى كەلەدى جانە ونى ىسكە اسىرۋعا كەدەرگى جاساپ وتىر. بىرىنشىدەن، ءىرى قارا مال تەك شەتەلدەن عانا جەتكىزىلۋى شارت. شاعىن جانە ورتا كاسىپورىندار ءۇشىن بۇل - تىم اۋىر تالاپ. سەبەبى كوپ قارجى كەتەدى. ونىمەن باعدارلاما ارقىلى شاعىن جانە ورتا بيزنەستى قولداۋ مۇمكىن ەمەس. شارۋاشىلىقتار شەتەلدەن مالدى تاسىمالداۋ شارالارىنا كوپ شىعىندالادى. كەدەندىك جانە سالىقتىق شىعىندار بار. وعان قوسا، شەتەلدەن اكەلىنگەن مالدى ءۇش اي بويى كارانتيندىك ايماقتا ۇستاۋ قاجەت. وندايدا فەرمەر ءاربىر كۇنگە اقشا تولەيدى» ، - دەدى ن. التايەۆ بۇگىنگى پلەنارلىق وتىرىستا.

ونىڭ سوزىنە قاراعاندا، اسىل تۇقىمدى مالدى رەسپۋبليكانىڭ ىشىندە ساتىپ الۋعا رۇقسات جوق. الايدا قازاقستاندا ونداي شارۋاشىلىقتار از ەمەس. سونىڭ بارلىعىنا بيۋدجەتتەن قىرۋار قاراجات بولىنگەن بولاتىن. رەسپۋبليكا بويىنشا  1044  اسىل تۇقىمدى مال باسىن كوبەيتۋگە 47 ميلليارد تەڭگە جۇمسالدى. اتالعان شارۋاشىلىقتاردا 300 مىڭنان استام اسىل تۇقىمدى مال بار. «ءبىراق سونىڭ بارلىعىن «سىباعا» باعدارلاماسى اياسىندا ساتىپ الۋعا رۇقسات جوق. بىلايشا ايتقاندا، وزىمىزدە تۇرعان اسىل تۇقىمدى مالدى باعدارلاما اياسىندا ساتىپ الا المايمىز. سوندا ول شارۋاشىلىقتى نە ءۇشىن قۇردىق؟ قىرۋار بيۋدجەت قاراجاتىن نە ءۇشىن جۇمسادىق؟ قازىرگى كەزدە شارۋالار وزىمىزدەگى اسىل تۇقىمدى مالدى سويىپ، ەتكە تاپسىرا باستادى. باسقا امال قالمادى» ، - دەپ اتاپ كورسەتتى ن. التايەۆ.

وسىعان بايلانىستى ءبىر توپ دەپۋتاتتار «سىباعا» باعدارلاماسى اياسىندا وزىمىزدەگى اسىل تۇقىمدى مالدى ساتىپ الۋعا رۇقسات بەرۋ قاجەت دەپ سانايدى.