سانكت-پەتەربۋرگتە ءاليا مولداعۇلوۆاعا ەسكەرتكىش ورناتىلدى
قازاقستان رەسپۋبليكاسىنىڭ رەسەي فەدەراتسياسىنداعى توتەنشە جانە وكىلەتتى ەلشىسى يمانعالي تاسماعامبەتوۆ سالتاناتتى شارادا ءسوز سويلەي وتىرىپ، «ءبىز تەك باتىر وتانداسىمىزدى ەسكە الىپ قانا قويماي، ەكىنشى دۇنيەجۇزىلىك سوعىستاعى بارلىق باتىرلارعا، سونىڭ ىشىندە لەنينگراد قورعاۋشىلارىنا قۇرمەت كورسەتىپ وتىرعانىمىزدى» اتاپ ءوتتى.
«19 جاستاعى ءاليا ۇزدىكتەردىڭ ءبىرى بولدى. ول سنايپەرلىك قارۋىنان 78 فاشيستىڭ كوزىن جويىپ قانا قويماي، ءوزىنىڭ جاستىق شاعى مەن ءومىرىن بارلىعىمىزدىڭ ورتاق وتانىمىز ءۇشىن قيدى»، - دەدى ەلشى.
ءاليا مولداعۇلوۆانىڭ ەسكەرتكىشى سانكت-پەتەربۋرگتا قىزىل گۆارديا اۋدانىندا قىزىل گۆارديا كوشەسىندەگى قالا ساياباقتارىنىڭ بىرىندە ورنالاسقان. بيىكتىگى 3 مەترلىك قولادان جاسالعان ءمۇسىن قىزعىلت گرانيتتى تۇعىرعا ورناتىلعان. وعان باتىر قىزدىڭ ەسىمى مەن جۇلدىزى ويىلىپ سالىنعان. تۇعىردىڭ ارعى بەتىندە ونىڭ قاھارماندىعى تۋرالى قىسقاشا مالىمەت بەرىلگەن.
ەسكەرتكىشتى سانكت-پەتەربۋرگ ۇكىمەتى، رەسەيدەگى قازاقستان ەلشىلىگى، اقتوبە جانە اتىراۋ وبلىستارىنىڭ اكىمدىكتەرى بىرلەسىپ ورناتتى. شىعارماشىلىق جوبانىڭ اۆتورى - تانىمال قازاق ءمۇسىنشىسى ەدىگە راحماديەۆ.
