جۇمىسقا قابىلداناردا قايتپەك كەرەك؟
ءوزىڭدى قالاي ۇستاعان دۇرىس؟ سۇحباتتاسۋ بارىسىندا نەنى اڭگىمە ەتۋ كەرەك؟
مىنە، وسى سۇراقتار جۇمىس ىزدەۋشىلەردى ابىگەرگە تۇسىرەتىنى انىق. جاۋاپ بەرمەس بۇرىن، الدىمەن اڭگىمەلەسۋ كەزىندە جىبەرىلەتىن ولقىلىقتارعا مۇقيات بولعان دۇرىس.
اڭگىمەلەسۋ دەگەنىمىز - جۇمىس بەرۋشىمەن جۇمىس ىزدەۋشىنىڭ اراسىنداعى قىزمەتتىك كەزدەسۋ. كەزدەسۋ كەزىندە كومپانيانىڭ بولاشاعى تۋرالى، مانساپ، جۇمىس تاجىريبەسى ءسوز ەتىلەدى. سوندىقتان قويىلاتىن بارلىق سۇراقتارعا ءازىر بولۋ كەرەك. اڭگىمەلەسۋدەن جاقسى ءوتىپ، جۇمىسقا تەز تۇرىپ كەتۋ ءۇشىن بىرنەشە كەزەڭدەرگە الدىن الا دايىندالعان ابزال.
جۇمىس بەرۋشىمەن تەلەفون ارقىلى سويلەسۋ.
تەلەفونمەن سويلەسۋ - بۇل ءسىزدىڭ جۇمىس بەرۋشىمەن ەڭ ءبىرىنشى جەكە قاتىناسىڭىز بولعاندىقتان وسى كەزەڭدە جاقسى اسەر قالدىرۋ ماڭىزدى. ءتىپتى كەزدەسۋدى حاتشى قىز بەلگىلەسە دە، ول تىكەلەي باسشىسىنا نەمەسە اڭگىمەلەسۋ وتكىزەتىن ادامعا ءسىزدىڭ اڭگىمەلەرىڭىز قالاي وتكەنىن مىندەتتى تۇردە ايتىپ بەرەدى. سىزبەن اڭگىمەلەسۋدى كىم وتكىزەتىنىن، ونىڭ اتى- ءجونىن ءبىلىپ الىڭىز. سونداي-اق مەكەمەنىڭ مەكەن- جايىن تولىق سۇراپ الىپ، كەزدەسۋدى بەلگىلەڭىز.
كەشىگۋگە جول بەرمەڭىز.
اڭگىمەلەسۋگە كەشىگىپ بارماڭىز. ەگەر ءسىز نەبارى 5 مينۋتقا كەشىكسەڭىز كەزدەسۋ بولماۋى دا عاجاپ ەمەس. ماڭىزدى كەزدەسۋگە ۋاقىتىسىندا كەلمەگەن قىزمەتكەر، ەرتەڭ كۇندەلىكتى جۇمىس كەزىندە قالاي ۇلگىرەدى دەگەن وي تۋۋ مۇمكىن. سوندىقتان ۇيىڭىزدەن ەرتە شىعىپ، ۋاقىتىسىنان بۇرىن كەلسەڭىز كۇتە تۇرىڭىز.
سىرتقى كيىمىڭىزگە ءمان بەرىڭىز.
ءسىزدىڭ سىرتقى كەلبەتىڭىز ۇلكەن ءرول وينايتىنىن ۇمىتپاڭىز. كەزدەسۋگە دۇرىس كيىنىپ، ءۇستى باسىڭىزعا تياناقتى بولىڭىز. قالاي بولسا سولاي ەمەس، ىسكەر كوستيۋم كيگەنىڭىز دۇرىس. ويتكەنى سىزگە دەگەن كوزقاراس جاقسى بولۋى ءتيىس. تىم قاراپايىم نەمەسە تىم اشىق كيىمدەردى ۇستىڭىزگە ىلمەگەنىڭىز ابزال. قىز كەلىنشەكتەر ادەمى بويانىپ، ال ەر ادام بولسا ساقال مۇرتىن قىرىپ، شاشىن جۋىپ رەتكە كەلتىرىپ بارۋ كەرەك. اۋزىڭىزدان جاعىمسىز ءيىستىڭ بولماۋىن قاداعالاپ، ۇستىڭىزگە ءاتىر سەۋىپ بارىڭىز.
وزىڭىزگە سەنىمدى، ءارى پسيحولوگيالىق دايىندىقتان ءوتىڭىز.
سۇحباتتاسۋ بارىسىندا وزىڭىزگە سەنىمدى وتىرىڭىز. سونىمەن قاتار جۇمىس بەرۋشىگە ءجيى- ءجيى جىميىپ قويساڭىز ارتىق ەتپەيدى. ول ءسىزدىڭ سىپايلىعىڭىزدى بىلدىرەدى. ارتىق اڭگىمەلەر، دورەكى سوزدەرگە جول بەرمەڭىز. سۇراقتارىڭىز بولسا قىسىلماي، قورىقپاي قويا بەرۋگە بولادى. جۇمىس بەرۋشىنىڭ كوزىنە تىك قاراپ سويلەڭىز. اڭگىمەلەسۋگە كەلەرىڭىزدە مىندەتتى تۇردە تۇيىندەمەڭىزدى، ديپلوم، سەرتيفيكاتتارىڭىزدى الىپ كەلۋدى ۇمىتپاڭىز. جۇمىس بەرۋشىنىڭ سۇراقتارىنا مۇدىرمەي، قوبالجىماي جاۋاپ بەرىڭىز. سول ءۇشىن الدىن الا پسيحولوگيالىقدايىندالىڭىز. بۇل سىناق ەمەس. تەك ەكى ادامنىڭ كەزدەسۋى.
قىزمەت ورنى ءسىز ءۇشىن قانشالىقتى قىزىقتى؟
ءدال وسى سۇراق ماڭىزدى. ۇسىنىلىپ وتىرعان ورىن سىزگە لايىقتى ما؟ ءسىزدىڭ قولىڭىزدان كەلە مە؟ تالاپتارىنا ساي كەلەسىز بە؟ كوپتەگەن ماماندار وسى تۇستا قاتەلەسىپ جاتادى. ەگەر بۇل ۆاكانسيا ويىڭىزدان شىقپاسا، ءوزىڭىزدىڭ دە، وزگەنىڭ دە ۋاقىتىن الماي باس تارتقانىڭىز دۇرىس. سونداي-اق مەكەمەنىڭ بولاشاعى جوق، كەلەشىگىنەن ءۇمىت كۇتپەيتىن بولساڭىز تەزىرەك قوشتاسىڭىز. دەگەنمەن تاڭداۋ ءوز ەركىڭىزدە. ىسكە ءسات!