تايلاند كورولى ءوزىنىڭ وققاعارىنا ۇيلەندى

 نۇر- سۇلتان. قازاقپارات - تايلاند كورولى ماحا ۆاچيرالونگكورن (راما ح) ءوزىنىڭ وققاعارى سۋتحيدا ۆاچيرالونگكورنگە ۇيلەنىپ، وعان حانشايىم دارەجەسىن بەردى، دەپ حابارلايدى «قازاقپارات» حاا بي- بي- سي اگەنتتىگىنە سىلتەمە جاساپ.

66 جاستاعى ماحا ۆاچيرالونگكورن بۇعان دەيىن ءۇش رەت ۇيلەنگەن، جەتى بالاسى بار.

 ۇيلەنۋ ءساتى سارسەنبى كۇنى كەشكىسىن تايلاند تەلەارنالارىنان كورسەتىلدى. سالتاناتتى راسىمگە كورول وتباسىنىڭ مۇشەلەرى مەن جوعارى شەندى تۇلعالار قاتىستى. نەكەلەسۋ راسىمىندە ەلدىڭ داستۇرلەرى ساقتالىپ، حانشايىم ماحا ۆاچيرالونگكورننىڭ الدىندا باس ءيدى. ال كورول سۋتحيدا حانشايىمنىڭ باسىنا كيەلى سۋ قۇيىپ، ارتىنشا جۇپ نەكە تۋرالى كۋالىككە قول قويدى.

 ءداستۇر بويىنشا، كورولگە قۇداي جانە جارتى قۇداي رەتىندە قاراۋ كەرەك، سوندىقتان ول وزگەلەردەن جوعارى تۇرادى. رەسمي راسىمدەر كەزىندە ونىڭ اياقتارى باسقا ادامداردىڭ باستارىنان جوعارى تۇرۋى شارت.

 2014 -جىلى ۆاچيرالونگكورن Thai Airways اۋە كومپانياسىنىڭ بۇرىنعى ستيۋاردەسساسى سۋتحيدا تيدجايدى ءوزىنىڭ كۇزەت قىزمەتى قولباسشىسىنىڭ ورىنباسارى ەتىپ تاعايىنداعان. 2016 -جىلدىڭ جەلتوقسان ايىندا وعان گەنەرال دارەجەسى بەرىلدى.