تۇركيا جاستارى قازاقستانعا كەلىپ، نازاربايەۆتان پرەزيدەنتتىكتەن باس تارتپاۋدى وتىنبەك بولعان

كۇرشات زورلۋ تۇرىك ەلى تۇركيا مەن رەسەي اراسىنداعى ماسەلەنى شەشۋگە ايرىقشا ۇلەس قوسقانى ءۇشىن ق ر تۇڭعىش پرەزيدەنتىنە شەكسىز العىسىن بىلدىرەتىنىن باسا ايتتى. سيرياعا قاتىستى كەلىسسوزدەر ەلباسى ن. نازاربايەۆتىڭ بىتىمگەرلىك قاسيەتىن انىق تانىتقانىن اتاپ ءوتتى.

 «پرەزيدەنتتىك وكىلەتتىگىڭىزدەن ءوز ەركىڭىزبەن باس تارتۋ تۋرالى شەشىمىڭىزدى دە تۇركياداعى ميلليونداعان حالىق قاداعالادى. سىزگە جەتكىزگىم كەلەدى، وسى حاباردى تۇركيا ەستىگەن كەزدە جۇرتشىلىق قاتتى وكىنىش ءبىلدىردى. ال ەڭ قىزىعى الەۋمەتتىك جەلىدە قىزۋ پىكىرتالاس بولىپ، جاستارىمىزدىڭ كوپشىلىگى قازاقستانعا كەلىپ، شەشىمىڭىزدەن باس تارتۋىڭىزدى وتىنگىسى كەلدى. ارينە، ءسىزدىڭ ساليقالى شەشىمىڭىز الەمدىك كوشباسشىلىق تاريحىندا التىن ارىپتەرمەن جازىلىپ قالاتىن بولادى. ويتكەنى مۇنداي شەشىمدى تەك ەلىن ويلاعان ناعىز ليدەر عانا ءىس جۇزىنە اسىرا الادى»، - دەدى ول.

 ونىڭ اتاپ وتۋىنشە، قازاقستان قازىرگى تاڭدا تاۋەلسىزدىگى جاڭا عانا تانىلعان جاس مەملەكەت ەمەس، الەم تانىپ قۇرمەت كورسەتكەن بولاشاعىنا نىق سەنىممەن قاراعان ماڭگىلىك ەل.

 "ءسىزدىڭ تاۋەلسىزدىكتىڭ العاشقى جىلدارىندا كوتەرگەن تۇركى الەمىن بىرىكتىرۋ يدەياڭىز بۇگىنگى تاڭدا تولىق ىسكە استى. ءسىزدىڭ باستاماڭىزبەن قۇرىلعان تۇركسوي، تۇركى كەڭەسى، تۇركى اكادەمياسى تۇركى تىلدەس مەملەكەتتەردىڭ تەمىرقازىعىنا اينالدى. ءسىز ءبىر سوزىڭىزدە "اق تەڭىزدەن التايعا دەيىنگى ۇلان بايتاق جەردەگى تۇركى دۇنيەسى ىنتىماق پەن بىرلىكتە بولۋى كەرەك" دەگەن ەدىڭىز. بۇل تۇسىنە بىلگەنگە كەلەشەك ۇرپاققا دەگەن وسيەتىڭىز"، - دەدى كۇرشات زورلۋ.