نۇر-سۇلتاندا اكەلەر سلەتى ءوتتى
400 دەن استام ادام قاتىسقان سلەت قالا اكىمدىگى مەن ءبىلىم باسقارماسىنىڭ ۇيىمداستىرۋىمەن ءوتتى. شارا ماقساتى - وتباسى ينستيتۋتى مەن وتباسىدا تاربيە بەرۋدەگى اكە ءرولىن نىعايتۋ، رۋحاني داستۇرلەر مەن وتباسىلىق قۇندىلىقتاردى قايتا جاڭعىرتۋ، ساقتاۋ.
«بۇل - ءداستۇرلى شارا. ول بىرنەشە جىل قاتارىنان وتكىزىلۋدە. بۇگىن ول №79-مەكتەپتىڭ قابىرعاسىندا ۇيىمداستىرىلدى. شارانى وتكىزۋ ورنى كەزدەيسوق تاڭدالعان جوق. وقۋ ورداسىنىڭ اكىمشىلىگى مەن قامقورلىق كەڭەسى اتالمىش باعىتتا بەلسەندى جۇمىس ىستەيدى. ءبىزدىڭ اكەلەر كەڭەسى داۋلى ماسەلەلەردى شەشۋگە قاتىسادى، مىنەزى اۋىر جاسوسپىرىمدەرمەن اڭگىمەلەسەمىز، ولارمەن جۇمىس ىستەيمىز. بۇل بالالارعا دا وڭ اسەر ەتەدى. ولار وزدەرىنىڭ مىنەزىن وزگەرتەدى. مىنەزى اۋىر جاسوسپىرىمدەر اراسىندا دەۆيانتتىق مىنەز تانىتۋ تومەندەپ كەلەدى. بۇدان بولەك، بەلسەندى اكەلەر اعاش وتىرعىزۋعا، جوندەۋ جۇرگىزۋگە كومەكتەسەدى. مەكتەپ پەن اتا-انالار اراسىنداعى تىعىز قارىم-قاتىناس ورناعان كەزدە، ەرەسەكتەر ءوز ۋاقىتىن، نازارىن بولگەن كەزدە، بالالار ءۇشىن جاعداي ۇتىمدى بولادى»، - دەيدى بەلسەندى اكەلەردىڭ ءبىرى تيمۋر قالدىبايەۆ.
سلەت «اكە ماحابباتى» پرولوگىمەن، اكەلەر حورىنىڭ ورىنداۋىنداعى «اتامەكەن» انىمەن باستالدى.
شارا قاتىسۋشىلارى «باقىتتى اكە - ءومىر سالتى» كورمەسىن تاماشالاپ، № 79-مەكتەپ- ليتسەي وقۋشىلارىنىڭ ءوز اكەلەرىمەن ازىرلەگەن ستارتاپ-جوبالارمەن تانىستى. TED- كونفەرەنسيا اياسىندا سپيكەرلەر اكە تاربيەسىنىڭ قۇپيالارىمەن ءبولىسىپ، قازاقستاندىق وتباسىلاردىڭ پروبلەمالارىن تالقىلادى، سول پروبلەمالاردى جەڭۋ جولدارىن ۇسىندى.
بۇدان بولەك، «روديتەلسكي چاس» وتباسىلىق قوناق ۇيىندە بەلسەندى اكەلەر دەمالىس كۇنگى كلۋبتىڭ، سۋرەت ستۋدياسى مەن وتباسىلىق تەاتردىڭ جۇمىسىمەن تانىستىردى.
شارا سوڭىندا ەڭ بەلسەندى اكەلەرگە، اۋداندىق سلەتتەردىڭ جەڭىمپازدارىنا ديپلومدار مەن ەستەلىك سىيلىقتار تابىستالدى.
اكەلەر سلەتى «تالانتتى اتا-انالار، تالانتتى بالالار» فەستيۆالىمەن اياقتالدى.