اقتاۋ پورتىنا يران اسكەري-تەڭىز كۇشتەرىنىڭ جاۋىنگەرلىك كەمەلەرى كەلدى

اقتاۋ. قازاقپارات - ەكىجاقتى اسكەري ىنتىماقتاستىقتى نىعايتۋ ماقساتىندا اقتاۋ پورتىنا يران يسلام رەسپۋبليكاسىنىڭ اسكەري-تەڭىز كۇشتەرىنىڭ جاۋىنگەرلىك كەمەلەرى كەلىپ جەتتى، دەپ حابارلايدى «قازاقپارات».

ق ر قورعانىس مينيسترلىگىنىڭ باسپا ءسوز قىزمەتىنەن ءمالىم ەتكەندەي، يراندىق «دجۋشان» جانە «سەپار» كەمەلەرىنىڭ جولداعى قاشىقتىعى شامامەن 450 تەڭىز ميلىن قۇراعان. ولاردى اقتاۋ تەڭىز پورتىندا ق ر اسكەري-تەڭىز كۇشتەرىنىڭ «قازاقستان» زىمىراندىق- ارتيللەريالىق كەمەسى قارسى الدى.

حاتتاماعا سايكەس، قر قارۋلى كۇشتەرىنىڭ اسكەري- تەڭىز كۇشتەرى مەن يران يسلام رەسپۋبليكاسى ارمياسىنىڭ اسكەري-تەڭىز كۇشتەرى اراسىندا كەمەلەردىڭ ءوزارا ساپار الماسۋى، سونداي-اق كەمە ەكيپاجدارىنىڭ ەكسكۋرسيالارى قاراستىرىلعان.

تاجىريبە الماسۋ باعدارلاماسى اياسىندا سپورتتىڭ ءار ءتۇرى بويىنشا جارىستار وتكىزىلەتىن بولادى. سونداي-اق يران اسكەري-تەڭىز كۇشتەرىنىڭ ەكيپاجى اقتاۋدىڭ كورىكتى جەرلەرى مەن مادەني وبەكتىلەرىن ارالايتىنى جوسپارلانعان.

ەستەرىڭىزگە سالا كەتەيىك، 2017-جىلدىڭ قىركۇيەگىندە ق ر اسكەري-تەڭىز كۇشتەرىنىڭ «سارى-ارقا» جانە «ورال» زىمىراندىق-ارتيللەريالىق كەمەلەرى يران يسلام رەسپۋبليكاسىنىڭ بەندەر-ەنزەلي پورتىنا باردى.