شەتەلدەگى قازاقتارعا ارنالعان بايلانىس ورتالىعى ىسكە قوسىلدى
«ءبىر تەرەزە» قاعيداسىمەن جۇمىس ىستەيتىن ورتالىقتان شەتەلدەگى قانداستار قازاقستان ازاماتتىعىن الۋ، الەۋمەتتىك جەڭىلدىكتەر مەن تولەمدەردى تولەۋ تۋرالى، سونداي- اق مەملەكەتتىك كومەكتەر مەن ورالمان كۆوتاسىن الۋعا قاتىستى اقپاراتتاردى الا الادى.
«ءبىرىڭعاي بايلانىس ورتالىعى قاجەتتى اقپاراتتاردى بەرۋدەن بولەك، شەتەلدەگى دياسپورالارمەن تىكەلەي جۇمىس ىستەپ، ءوزارا بايلانىستا بولادى. بۇل قىزمەت سىرتتاعى قانداستارىمىزعا قولداۋ كورسەتۋدىڭ ءبىر بولىگى عانا، الداعى ۋاقىتتا ورتالىق اشۋدى دا كوزدەپ وتىرمىز، ازىرگە وزدەرىن مازالاعان سۇراقتارىنىڭ جاۋابىن تەلەفون ارقىلى عانا الا الادى. الداعى ۋاقىتتا ءبىرىڭعاي بايلانىس ورتالىعىنىڭ جۇمىسى شەتەلدەگى قانداستاردى قولداۋعا ارنالعان باعدارلامانىڭ ىشىنە ەنەتىن بولادى. بۇل باعىتتا بۇگىندە ءتيىستى شارالار قولعا الىنۋدا. ورتالىققا الەمنىڭ بارلىق بۇرىشىنان ءتيىستى نومەر ارقىلى تەگىن حابارلاسۋعا بولادى» ، - دەدى «وتانداستار» قورىنىڭ پرەزيدەنتى نۇرتاي ابىقايەۆ.
ودان بولەك، ورتالىق شەتەلدەگى قانداستارعا مەملەكەت تاراپىنان بەرىلەتىن ءتۇرلى باعدارلامالاردى ءتۇسىندىرىپ جانە ولارعا قاتىسۋ ءۇشىن قۇجات جيناۋعا قولداۋ كورسەتەدى.
شەتەلدەگى باۋىرلار بايلانىس ورتالىعىنا 1404 (ۇيالى تەلەفونعا ارنالعان) ، 88000801404 (قازاقستان بويىنشا قوڭىراۋ شالۋ) ، 77172981404 (شەتەلدەن قوڭىراۋ شالۋ) نومىرلەرى بويىنشا حابارلاسا الادى.
ۇيىمداستىرۋشىلاردىڭ ايتۋىنشا، ورتالىق قىزمەتى ۇستىمىزدەگى جىلدىڭ اقپان ايىنان باستاپ تەستىلەۋ رەجيمىنەن ءوتتى.
سونىمەن قاتار، شەتەلدەگى وتانداستارمەن بايلانىس ورتالىعىنىڭ جۇمىسى مەن ونىڭ ساپاسىن قامتاماسىز ەتۋ ماقساتىندا وتانداستار قورى مەن قازاقتەلەكوم اراسىنداعى ءوزارا ىنتىماقتاستىقتى دامىتۋ تۋرالى مەموراندۋمعا قول قويىلدى.
ول بويىنشا ورتالىقتىڭ جۇمىسىن ودان ءارى دامىتۋ كوزدەلىپ وتىر، ياعني كەلەشەكتە مەملەكەتتىك ورگاندار مەن ۇكىمەتتىك ەمەس ۇيىمداردىڭ بارلىق اقپاراتتىق جۇيەلەرىمەن بىرىكتىرىلەدى.
سونداي- اق، الداعى ۋاقىتتا پايدالانۋشىلارعا قولايلى بولۋى ءۇشىن WhatsApp, Telegram جانە Skype كوممۋنيكاتسيالىق قوسىمشالارى ارقىلى كەڭەس الۋ مۇمكىندىگى تۋادى.
