اقجارقىن تۇرلىبايدىڭ ءىسى: قىتايداعى ديپلوماتتار وعان ءوز قالتاسىنان كومەكتەسۋدە

 نۇر-سۇلتان. قازاقپارات - قىتاي تۇرمەسىندە وتىرعان قازاقستاندىق اقجارقىن تۇرلىبايدىڭ ومىرىنە قاتىستى تىڭ مالىمەتتەر بەلگىلى بولدى دەپ حابارلايدى «استانا» ارناسى.

قازاقستاننىڭ قىتايداعى توتەنشە جانە وكىلەتتى ەلشىسى شاحرات نۇرىشيەۆتىڭ سوزىنشە، كونسۋل ەكى ايدا ءبىر رەت بويجەتكەنمەن تۇرمەدە جۇزدەسىپ تۇرادى. بارىپ تۇرعان سايىن ول اقجارقىنعا اقشالاي كومەك كورسەتەدى. وعان قوسا، قازاقستاندىق ارۋدى اعىلشىن ءتىلىن مەڭگەرۋگە ارنالعان وقۋلىقتارمەن قامتاماسىز ەتۋدە.

«بولات قادىر ۇلى ەكى ايدا ءبىر رەت اقجارقىن تۇرلىبايعا بارىپ تۇرادى. ول كىسى بويجەتكەنگە ءوز قالتاسىنان اقشالاي كومەكتەسىپ، كىتاپتار مەن وعان قاجەتتى زاتتاردى ساتىپ اپەرەدى. ءبىزدىڭ بيۋجەتتە بۇل اقشا قاراستىرىلماعان»، - دەدى نۇرىشيەۆ.

ەلشى قاراجات ادەتتە، تەك قازاقستاندىقتىڭ ءولىمى كەزىندە ونىڭ تۋىسقاندارىنا كومەكتەسۋ ءۇشىن بولىنەدى. الايدا، كەيىننەن ول اقشا مىندەتتى تۇردە مەملەكەتكە قايتارىلۋى كەرەك.

«ال ەندى مۇنداي نارسەلەرگە بىزدە اقشا قاراستىرىلماعان. سول سەبەپتى، ءبىز ءوزىمىز اقشا جيناپ بەرۋگە ءماجبۇرمىز»، - دەدى ەلشى.

انىقتالعانداي، ەسىرتكى تاسىمالى ءۇشىن ايىپتالعان اقجارقىن تۇرلىبايدىڭ ءىسى ءالى اياقتالعان جوق. قازىرگى تاڭدا، قوسىمشا تەرگەۋ جۇمىستارى جۇرگىزىلىپ جاتىر. ونىڭ اياسىندا، بويجەتكەننىڭ قازاقستاننان كەتۋىنە قاتىسى بار ادامداردان جاۋاپ الىنىپ جاتىر.

ەلشىلىكتىڭ مالىمدەۋىنشە، قىتاي سوتى اقتىق شەشىمىن بارلىق ءمان-جايدى انىقتاعان سوڭ شىعاراتىنىن جەتكىزدى.

ەسكە سالا كەتەيىك، جاس قازاق قىزى 2014-جىلى گۋانجوۋ اۋەجايىندا تۇتقىندالعان بولاتىن. ونى اسا اۋقىمدى مولشەردەگى ەسىرتكى تاسىمالى كۇدىكتى دەپ تانىعان... الايدا، بويجەتكەن ءوز كىناسىن مويىنداعان جوق. ول تىيىم سالىنعان زاتتاردى وزىنە سالىپ جىبەرگەنىن العا تارتتى.

ق ح ر سوتى ونى كىنالى دەپ تاۋىپ، ءومىر بويى باس بوستاندىعىنان ايىرعان. الايدا، كەيىننەن بۇل شەشىم زاڭدىق كۇشىن جويدى. بۇگىندە ءىس قايتا قارالۋ ۇستىندە.