باي جانە تانىمال بولۋ ءۇشىن نە ىستەۋ كەرەك؟
نۇر-سۇلتان. قازاقپارات - تاڭعى اس الدىندا سۋىق سۋعا ءتۇسۋ، ەرتە جاتىپ، ەرتە تۇرۋ. The Guardian باسىلىمىنىڭ جازۋىنشا، بۇگىندە تانىمال ميللياردەرلەردىڭ بارلىعى وسى ءتارتىپتى ۇستاناتىنىن ايتىپ ءجۇر.
باسىلىمنىڭ جازۋىنشا، ولاردىڭ كۇن ءتارتىبى قاراپايىم حالىقتىڭ اقىلىنا سىيمايدى.
«جاقىندا تۆيتتەر باسشىسى دجەك دورسي تاڭەرتەڭ سالقىن سۋعا تۇسەتىنىن، جۇمىسقا جاياۋ باراتىنىن، كۇنىنە ەكى ساعات مەديتاتسيا جاسايتىنىن جانە كۇنىنە تەك ءبىر رەت تاماقتاناتىنىن ايتتى. كەشكى اسقا تەك ەت پەن كوكونىستەر جەيتىن ول تاماقتانۋعا بوسقا ۋاقىت كەتىرمەيتىنىن ايتىپ ءوتتى»، - دەپ جازادى باسىلىم.
اۆتوردىڭ ايتۋىنشا، بۇل شىنايى ومىردەن الىس كورىنىستەر. شىنايى ومىردە جاقىندارىڭمەن كەلىسۋ ۇنەمى وڭاي ەمەس، ۇيقى قىسادى، جالقاۋلىق باسادى، بالالاردى ساباققا اپارۋ كەرەك، ءتىزىم وسىلايشا جالعاسا بەرەدى.
«قازىر ۇيقى مەن ۋاقىت ەڭ قۇندى تاۋارعا اينالدى. ال تەحنيكا سالاسىنداعى تانىمال تۇلعالار، باس ديرەكتورلار مەن كوپتەگەن بەلگىلى ادامدار قاتاڭ كۇن تارتىبىمەن ماقتانىپ ءجۇر. ولاردىڭ ايتۋىنشا، بايلىقتىڭ كىلتى - ونىمدىلىكتى ارتتىرۋ. بۇلاردىڭ قاتاڭ كۇن ءتارتىبى حالىقتىڭ شىنايى كۇندەلىكتى ومىرىنەن تىم الىس جانە ولاردى الداۋ»، - دەپ جازادى اۆتور.
اۆتوردىڭ ايتۋىنشا، پسيحولوگيالىق زەرتتەۋلەر جەتىستىككە جانە بايلىققا جەتۋ ادامنىڭ ەرىك جىگەرىنە بايلانىستى ەكەنىن كورسەتكەن.
«ۇلكەن جەتىستىككە جەتۋ ءۇشىن كۇندە كىشكەنتاي جەتىستىكتەرگە جەتۋ كەرەك. بۇل كۇندەلىكتى ەڭبەكتى قاجەت ەتەدى. سول سەبەپتى ميللياردەرلەردىڭ كۇن ءتارتىبىن قايتالاۋعا تىرىسپاي، ەرىك-جىگەرىڭدى جەتىلدىرە ءبىلۋ ماڭىزدى»، دەپ جازادى اۆتور.