ەلدوس سمەتوۆ: جاراقاتىم تولىق جازىلعان جوق

نۇر-سۇلتان. قازاقپارات - دزيۋدودان انتاليادا ءوتىپ جاتقان گران-پري تۋرنيرىنىڭ العاشقى جارىس كۇنىندە قازاق بالۋانى ەلدوس سمەتوۆ توپ جارعان بولاتىن.

ەلدوس جاراقاتىنان تولىق ايىقپاعان، دەپ حابارلايدى قازاقپارات ۇلتتىق وليمپيادا كوميتەتىنە سىلتەمە جاساپ.

«گران-پري سىنى جوعارى دەڭگەيدە ءوتىپ جاتىر. ۇيىمداستىرىلۋ جاعىنان كەمشىلىك جوق، سپورتشىلاردىڭ دەڭگەيى جوعارى. بارلىق جەكپە-جەك كەزىندە جانكۇيەرلەردىڭ، حالقىمنىڭ قولداۋىن سەزىندىم. جاقىندا جاراقات العانىمدى بىلەسىزدەر. يىعىمدى اۋىرتىپ العان سوڭ، ەكاتەرينبۋرگتەگى Grand Slam دوداسىنان باس تارتقان ەدىم. اراعا از ۋاقىت سالىپ، انتالياداعى سىندا توپ جاردىم. دارىگەرلەر دەنساۋلىعىمدى باقىلاپ وتىر. جاراقاتىمنان ءجۇز پايىز ايىعىپ كەتتىم دەپ ايتا المايمىن. يىعىم ءالى دە بولسا اۋىرادى. ودان بولەك، بەلدەسۋ كەزىندە قارسىلاسىم تىزەمنەن تەۋىپ، تاعى دا اۋىرسىنىپ قالدىم»، - دەدى ەلدوس سمەتوۆ.

دەگەنمەن، بۇل سپورت. سپورتتا مۇنداي كىشىگىرىم جاراقات كوپ كەزدەسەدى. ەڭ باستىسى - ءارى قاراي ۋشىقتىرىپ الماۋ كەرەك.

«توكيو وليمپياداسىنا ىرىكتەۋ سىنىندا جوعارى ۇپاي جيناپ، ءتورتجىلدىق دوداسىنا جولداما الۋدى باستى ماقسات تۇتتىم. بۇيىرسا، سول ويىمىزدى جۇزەگە اسىرۋعا تىرىسامىز»، - دەيدى سپورتشى.

60 كەلىدەگى قازاقستان كومانداسىنىڭ ۇزدىگى ەلدوس سمەتوۆ الەمدىك رەيتينگتە 6-ورىندا تۇر.

ەسكە سالا كەتسەك، جاكارتادا وتكەن ازيا ويىندارىندا ەلدوس سمەتوۆتى جاراقات الىپ قالعان ەدى. سوسىن قازان ايىندا تاتاميگە قايتا ورالدى.