قازاقستاندا العاش رەت بالمۇزداققا «حالال» سەرتيفيكاتى بەرىلدى

None
None
نۇر-سۇلتان. قازاقپارات - العاش بولىپ «لەڭگىر بالمۇزداعى» حالال ءونىم رەتىندە دايىنداۋ، وڭدەۋ، ساقتاۋ، تاسىمالداۋ جانە ساتۋعا قويىلاتىن جالپى تالاپتار ستاندارتى بويىنشا سەرتيفيكاتقا يە بولدى.

بۇل تۋرالى قازاقستان مۇسىلماندارى ءدىني باسقارماسى «حالال دامۋ» ج ش س ديرەكتورى ءانۋار ەلجانوۆ قازاقپارات تىلشىسىنە بەرگەن سۇحباتىندا ءمالىم ەتتى.

«ءوز ونىمىنە «حالال» اتاۋىن العىسى كەلەتىن كاسىپكەر الدىمەن بىزگە ءوتىنىش بىلدىرەدى. سودان سوڭ ءبىزدىڭ تەحنولوگ ماماندار ءونىمنىڭ تولىق قۇرامىن تەكسەرىپ شىعادى. بۇل شامامەن ءبىر ايعا جۋىق ۋاقىتتى الادى. وندا بارلىق قىزمەتكەرلەردىڭ جۇمىس جاساۋ بارىسى، سانيتارلىق تازالىق شارتتارىن ساقتاۋى، شاريعات تالاپتارىنا ساي ەمەس ونىمدەردى قولدانباۋى، مەكەمەگە شيكىزات ونىمدەرىن تاسىمالداۋشى كاسىپورىنداردىڭ قۇجاتتارى، تەحنيكالىق قۇرال-جابدىقتاردىڭ ستاندارت تالاپتارىنا ساي جابدىقتالۋى، قاپتامالاردىڭ ادام دەنساۋلىعىنا زياندى بولماۋى سەكىلدى ءونىم وندىرۋدەن باستاپ تاسىمالداپ ساتۋعا دەيىنگى بارلىق پروتسەسس تەكسەرىلدى»، - دەدى ءانۋار ەلجانوۆ.

ونىڭ ايتۋىنشا، حالال سەرتيفيكاتى 1 جىلعا جارامدى، سودان سوڭ ءونىمدى قايتا تەكسەرۋدەن وتكىزىپ، سەرتيفيكاتتى ودان ءارى ۇزارتۋعا بولادى. سونداي-اق، اتالعان ۇيىم كەلىسىمشارتقا سايكەس ءونىمدى جىلىنا 2 رەت تەكسەرۋگە قۇقىلى.

«تاعى ءبىر ايتىپ وتەتىن ماسەلە - ءونىمدى تەكسەرۋ بارىسىنا ەكى جاقتىڭ تەحنولوگ ماماندارى قاتىسادى. باستى تالاپ - ءونىم قۇرامى قوسپالارىنىڭ حالال بولۋى جانە تۇتىنۋ مەرزىمىنىڭ قاتاڭ ساقتالۋى. سەبەبى، كەي ءونىم قوسپالارى شەتەلدەن اكەلىنەدى، ونىڭ ءبارى جەكە-جەكە تەكسەرىلىپ، ولاردىڭ سەرتيفيكاتى سۇرالادى. ال لەڭگىر بالمۇزداعىنا كەلسەك، سەرتيفيكات بەرۋ ءۇشىن 2 ايعا جۋىق ۋاقىت جۇمسالدى جانە بۇل ماقساتتا 4 مامان جۇمىس ىستەدى»، - دەيدى ول.

حالال ورتالىعى باسشىسىنىڭ سوزىنە سەنسەك، تاۋارعا حالال دەگەن سەرتيفيكات الۋ - كاسىپكەردىڭ ءوز ەركىندەگى شارۋا، ياعني مىندەتتى ەمەس. دەگەنمەن، سوڭعى ۋاقىتتا حالال اتانعىسى كەلەتىن وتاندىق تاۋار وندىرۋشىلەر كوبەيىپ كەلەدى.

«قازىرگى تاڭدا تۇتىنۋشىلاردىڭ ازىق-تۇلىكتى ساتىپ العاندا «حالال» بولۋىنا ەرەكشە كوڭىل بولەتىنىن بايقايمىز، بۇل - ۋاقىت تالابى. ياعني، حالىق اراسىندا حالال دەگەن ۇعىم ءسىڭىسىپ، قالىپتاسقان دەپ ايتا الامىز»، - دەدى مەكەمە باسشىسى.

سونداي-اق، ءا. ەلجانوۆ قازىرگى تاڭدا ب ا ق بەتتەرىندە، الەۋمەتتىك جەلىدە ءجيى قوزعالىپ جۇرگەن «حالال» دەگەن جازۋى بار، ءبىراق قۇرامىنان حارام قوسپالار انىقتالىپ جاتاتىن وقيعالارعا قاتىستى ءوز پىكىرىن ءبىلدىردى.

«ءيا، ونداي وقيعالاردى ەستىپ جاتامىز. مىسالى، شۇجىق ونىمدەرىنىڭ قۇرامىنان شوشقا مايى تابىلىپتى دەگەن سەكىلدى. ءبىراق بۇگىنگە دەيىن ءبىز سەرتيفيكات بەرگەن ونىمدەردەن ونداي كەلەڭسىزدىكتەر انىقتالعان ەمەس. ويتكەنى، ءبىز ونىمگە حالال رۇقساتىن بەرەر الدىندا ناقتى تالاپتارعا ساي تەكسەرەمىز جانە وندىرۋشىلەردىڭ سول تالاپتاردى ۇستانۋىن مىندەتتەيمىز. ال تالاپ بۇزىلعان جاعدايدا ءونىم سەرتيفيكاتىن جارامسىز ەتىپ، ول تۋرالى حالىقتى سول مەزەتتە حاباردار ەتەمىز»، - دەدى ءا. ەلجانوۆ.

سوڭعى جاڭالىقتار