ەڭ كوپ جالاقى الاتىن فۋتبولشى قىز

 استانا. قازاقپارات - نورۆەگيا ۇلتتىق قۇراماسى مەن فرانسيانىڭ «ليون» كلۋبىندا وينايتىن ادا حەگەربەرگ الەمدە ەڭ كوپ جالاقى الاتىن فۋتبولشى قىز.

ءبىراق ونىڭ تابىسىن ەرلەردىڭ جالاقىسىمەن سالىستىرۋعا كەلمەيدى. France Football باسىلىمى حابارلاعانداي، ادا حەگەربەرگتىڭ الاتىن قارجىسى مەسسيدىڭ جىلدىق تابىسىنان 325 ەسە كەم ەكەن. ال ارگەنتينالىق فۋتبولشى الەمدە ەڭ كوپ ەڭبەكاقى الاتىن فۋتبولشى. فۋتبول تاريحىندا العاش رەت ايەلدەر اراسىندا «التىن دوپتى» العان ادا حەگەربەرگتىڭ جىلدىق تابىسى 400 مىڭ ەۋرونى قۇرايدى. مەسسي بولسا 130 ميلليون ەۋرو الادى. قىزدار اراسىندا جىلدىق تابىسى ەڭ جوعارى فۋتبولشىلار اراسىندا ادانىڭ كوماندالاستارى اماندا حەنري (360 مىڭ ەۋرو) مەن ۆەندي رەنار (348 مىڭ ەۋرو) دا بار. سونداي- اق العاشقى بەستىككە كارلي للويد («سكاي بلۋ»، 345 مىڭ ەۋرو) پەن مارتا («ورلاندو»، 340 مىڭ ەۋرو) ەنگەن. ايتا كەتەيىك، 2018 -جىلى ادا حەگەربەرگ «ليون» كومانداسىمەن چەمپيوندار ليگاسىن ۇتتى. فرانسيا چەمپيونى اتاندى.

Massaget.kz