كراننان الىنعان اۋىز سۋدى ءۇي جاعدايىندا قالاي تازارتۋعا بولادى؟

 نۇر-سۇلتان. قازاقپارات - سۋ ساپاسىن قالاي تەكسەرۋگە بولادى؟ سۋ ماسەلەسى قاشان دا وزەكتى.

كۇندەلىكتى تۇرمىستا قولدانىپ جۇرگەن سۋىمىزدىڭ قانشالىقتى تازا ەكەنىنەن حابارسىزبىز. سۋ تازالاۋدىڭ مەحانيكالىق، بيولوگيالىق جانە حيميالىق جولى بار. دەگەنمەن، ەلىمىزدە سۋ تازارتۋ ادىستەرىنىڭ ىشىنەن تەك قانا مەحانيكالىق ءادىس پايدالانىلادى. قازاقستاندا جۇزدەگەن سۋ تازارتۋ قوندىرعىلارى تۇرعىزىلعان.

بۇلاردىڭ جۇمىسىن ۇنەمى قاداعالاپ وتىرماسا - ولاردىڭ تيىمدىلىك كورسەتكىشتەرى تومەندەپ كەتۋى مۇمكىن. قازىرگى تاڭدا جاڭا تەحنولوگيانىڭ ەنگىزىلۋىنە بايلانىستى كوپتەگەن ادىستەر تاجىريبەدەن وتكىزىلۋدە. سوندىقتان تۇرمىستا قولداناتىن سۋدى، ءۇي جاعدايىندا تاعى ءبىر مارتە تازالاپ ىشسەڭىز وزىڭىزگە جاقسى. ال كۇندەلىكتى تۇتىناتىن سۋدى قالاي تازالاۋعا بولادى؟

اۋىز سۋ قۇرامىندا ءارتۇرلى حيميالىق قوسپالار كەزدەسەدى، دەگەنمەن سۋ قۇرامىندا بۇلاردان بولەك ادام اعزاسىنا قاۋىپتى ميكروورگانيزدەر دە بولۋى مۇمكىن.

اۋىز سۋ قۇرامىنداعى زياندى ميكروورگانيزمدەر ادام اعزاسىنا بىردەن اسەر ەتپەيدى. دەگەنمەن ۋاقىت وتە كەلە ونىڭ زاردابىن شەگەسىز. اۋىز سۋ قۇرامىنداعى ۋلى حيميكاتتار قانداعى ەريتروتسيتتەردى جويىپ، بۇيرەك، جۇرەك جانە مي جۇمىسىنا تىكەلەي اسەر ەتىپ، ءتۇرلى اۋرۋعا دۋشار ەتەدى.

كوپشىلىگىمىز شيكى سۋدى قايناتىپ ىشسەك، زياندى ميكروورگانيزمدەردى جويدىق دەپ ويلايمىز. الايدا قايناعان سۋدىڭ شيكى سۋعا قاراعاندا زيانى كوپ ەكەنىن بىلەسىز بە؟

پايدالى كەڭەس:

ەگەر سۋ قۇيىلعان ىدىسىڭىزدا جاسىل داقتار قالسا، بۇل سۋدىڭ قۇرامىندا تۇز قىشقىلى مەن كۇكىرت قىشقىلىنىڭ كوپ مولشەردە ەكەنىن بىلدىرەدى.

مەتالل ءدامى سەزىلسە ونىڭ قۇرامىنا تەمىر مولشەرىنىڭ كوپ ەكەنىن دالەلدەيدى. ەگەر سۋ قىزعىلت تۇستەس بولسا بۇل قۇبىرداعى سۋدىڭ تەمىرمەن لاستاناتىن بىلدىرەدى.

ەگەر ىدىسىڭىزدا قارا داقتار پايدا بولسا، وندا سۋدا سۋتەگى سۋلفيدى بار.

ەگەر سۋ قوڭىر نەمەسە قىزعىلت ءتۇستى داقتارمەن لاستانسا، بۇل سۋ قۇرامىندا تەمىردىڭ كوپ ەكەنىن بىلدىرەدى.

كران سۋىن قانداي جاعدايدا ىشۋگە بولمايدى

سۋ تۇنىق بولماسا ءارى ءتۇسى وزگەشە بولسا، سۋدىڭ ءبىرتۇرلى ءدامى بولسا، سۋدىڭ جاعىمسىز ءيىسى بولسا مۇلدەم ىشۋگە بولمايدى. سونىمەن قاتار تۇندىرىپ قويعان سۋىڭىزدا كوپ مولشەردە تۇنبا پايدا بولسا ىشپەگەنىڭىز ءجون.

سۋدى ءۇي جاعدايىندا قالاي تازارتۋعا بولادى

اۋىز سۋىنىڭ ساپاسىن ءۇي جاعدايىندا بىرنەشە تاسىلمەن جاقسارتۋعا بولادى:

-  تۇندىرۋ. الدىمەن، كراننان سۋ الىپ، ونى ىدىسقا قۇيىپ، 6-7 ساعاتقا دەيىن تۇندىرۋ كەرەك. بۇلۋاقىتتا سۋ ىشىندەگى اۋىر مەتالدار مەن حلور قوسپالارى سۋدان ۇشىپ كەتەدى.

- سۇزگىلەۋ. سۋدى كەز كەلگەن سۇزگى ارقىلى تازالاۋعا بولادى. سۋ بەلگىلى ءبىر ۋاقىت ىشىندە تۇرسا، ونى سۇزگىلەۋ قاجەت. سۇزگىنى مۇقيات تاڭداعان ءجون. سيليكون نەمەسە بەلسەندىرىلگەن كومىرتەكتى سۇزگىلەرگە ەرەكشە نازار اۋدارىڭىز، ويتكەنى ولار سۋدى ءتيىمدى تازارتادى. كرەمني نەمەسە بەلسەندىرىلگەن كومىر نەگىزىندەگى سۇزگىلەر سۋ ءۇشىن ءتيىمدى. بۇل كومپونەنتتەر زياندى زاتتار مەن قوسپالاردى سىڭىرۋدە ەرەكشە ءرول اتقارادى.

ۇزاق ۋاقىت بويى ادامدار سۋدى تازارتۋ ءۇشىن كرەمنيدى قولداندى. ال بەلسەندىرىلگەن كومىر ءتۇرلى سۇزگىلەردە قولدانىلادى. سۋ تازا بولۋ ءۇشىن كومىردى 12 ساعات بويى سۋدا ۇستاۋ جەتكىلىكتى.

- قايناتۋ. سۋدى قايناتۋ ءۇشىن ەلەكترلىك ەمەس، كادىمگى شاينەكتى پايدالانىڭىز.

- كۇمىسپەن تازارتۋ. شاۋگىمدەگى سۋعا قاراپايىم كۇمىس قاسىق سالىپ، ونىڭ قاسيەتتەرىن جاقسارتا الادى. ءتىپتى، مۇنداي سۋدىڭ ەمدىك قاسيەتىنە دە كوز جەتكىزەتىن بولاسىز.

تازا سۋ - ورگانيزم ءۇشىن ماڭىزدى ءرول اتقارادى. ادام ءومىرى مەن ونىڭ دەنساۋلىعىنا تىكەلەي اسەرىن تيگىزەدى. تازارتىلعان، ساپالى سۋ - دەنساۋلىعىڭىز ءۇشىن ماڭىزدى.