اۋا رايى: بۇگىن قازاقستاننىڭ باسىم بولىگىندە جاۋىن جاۋادى

كاسىپورىن تاراتقان مالىمەتتەرگە قاراعاندا، قازاقستاننىڭ باسىم اۋماعىندا اتموسفەرالىق فرونتالدى بولىكتەردىڭ وتۋىنە بايلانىستى جاۋىن-شاشىن بولادى. ەلدىڭ وڭتۇستىك-شىعىسىندا جاۋىن كوپ مولشەردە جاۋادى. رەسپۋبليكانىڭ كەي جەرلەرىندە تۇمان ءتۇسىپ، جەل كۇشەيىپ، وڭتۇستىكتە جانە وڭتۇستىك-شىعىستا نايزاعاي ويناپ، بۇرشاق جاۋۋى مۇمكىن.

سولتۇستىك قازاقستان وبلىسىنىڭ كەي جەرلەرىندە تۇمان ءتۇسىپ، كوكتايعاق بولادى. جەلدىڭ جىلدامدىعى سەكۋندىنا 15-20 مەترگە جەتىپ، ەكپىنى 23-28 م/س بولادى.

پاۆلودار، قاراعاندى، قوستاناي وبلىستارىنىڭ كەي جەرلەرىندە تۇمان ءتۇسىپ، جەلدىڭ جىلدامدىعى 15-20 م/س- قا جەتەدى.

الماتى، تۇركىستان وبلىستارىنىڭ كەي جەرلەرىندە جەل 15-20 م/س جىلدامدىقپەن ۇيتقيدى.

اقمولا وبلىسىنىڭ كەي جەرلەرىندە تۇمان ءتۇسىپ، كۇندىز جەل 15-20 م/س- قا دەيىن كۇشەيەدى.

اتىراۋ وبلىسىنىڭ ءبىرقاتار اۋماقتارىندا تۇمان ءتۇسىپ، تۇندە جەلدىڭ كۇشى 15-20 م/س- قا بارادى.

شىعىس-قازاقستان وبلىسىندا تۇندە جانە تاڭەرتەڭ كەي جەرلەردە تۇمان ءتۇسىپ، كۇندىز كەي جەرلەرىندە جەل 15-20 م/س جىلدامدىقپەن ۇيتقيدى.

جامبىل، قىزىلوردا، باتىس قازاقستان، ماڭعىستاۋ وبلىستارىنىڭ كەي جەرلەرىندە تۇمان ءتۇسۋى ىقتيمال.