دالا قىزعالداقتارىن نەگە جۇلۋعا بولمايدى

 نۇر- سۇلتان. قازاقپارات - ق ر ا ش م ورمان شارۋاشىلىعى جانە جانۋارلار الەمى كوميتەتىنىڭ باسپا ءسوز حاتشىسى ساكەن دىلداحمەت قىر قىزعالداقتارىن جۇلماۋدى ءوتىندى، دەپ حابارلايدى قازاقپارات.

«ءبىر قۇشاق قىزعالداقپەن سۋرەتكە ءتۇسۋ ءۇردىسى ءساۋىر- مامىر ايلارىندا كۇرت كوبەيەدى. بيىل دا مۇنداي فوتوسۋرەتتەر ەسەلەپ كوبەيەدى. ءبىراق، بۇگىن قىزعالداقتى نەگە جۇلۋعا بولمايتىنىن تۇسىندىرگىمىز كەلەدى. جابايى قىزعالداقتاردىڭ وزگە تۇرلەردەن ايىرماشىلىعى - ولار پيازشىقتان ەمەس، ءدان ارقىلى تارالادى. تۇقىم توپىراقتا 4-7 جىل جاتادى جانە سودان كەيىن عانا جاڭا پيازشىق قالىپتاسادى. بۇل پيازشىقتان گۇل ساباعى ءوسىپ شىعادى. گۇل كۇلتەلەنگەن سوڭ تۇقىم قاۋاشاعى پايدا بولادى. وسى پروتسەسس جىل سايىن قايتالانادى جانە ءبىر قىزعالداقتىڭ ءومىرى 70-80 جىلعا جەتەدى. ال كەيدە جەتپەۋى دە مۇمكىن. سەبەبى، ءسىز ءبىر فوتوسۋرەت ءۇشىن گۇلدى جۇلىپ الاسىز دا، 2 ساعاتتان كەيىن كۇرەسىنگە تاستايسىز. سەبەبى، جابايى قىزعالداق تەز سولادى. بۇل حاباردى بارلىق دوستارىڭىز بەن تانىستارىڭىزعا تاراتىڭىز» ، - دەپ جازدى ساكەن دىلداحمەت Facebook تەگى پاراقشاسىندا.

ايتا كەتەيىك، ەلىمىزدىڭ وڭتۇستىك وڭىرلەرىندە قىزعالداق گۇلى ءبۇر جاردى. قازاقستاندا وسەتىن 35 ءتۇرلى قىزعالداقتىڭ 18 ءى قىزىل كىتاپقا ەنگىزىلگەن، ولاردىڭ تارالۋ ايماعى دا قىسقارىپ بارادى.