استانا تاريحىن باياندايتىن ۆەب-سايت ىسكە قوسىلدى
«ماقساتىمىز - باس قالامىزدىڭ كەشەگى جانە بۇگىنگى كۇنى تۋرالى باياندايتىن جاڭا ۆەب-دەرەكتەر جوباسىن ۇسىنۋ. سوڭعى اي ىشىندە ەلەۋلى وقيعالاردىڭ كۋاسى بولىپ وتىرمىز. سونىڭ ءبىرى - ەلورداعا نۇر-سۇلتان اتاۋىنىڭ بەرىلۋى. بۇل قاي جاعىنان قاراساق تا - وتە ماڭىزدى قادام. ءبىزدىڭ شىعارماشىلىق توپ ءبىراز ۋاقىت ىزدەنىپ، جاڭا فورماتتاعى «استانا - نۇر-سۇلتان» اتتى ۆەب-دەرەكتەر سايتىن جاساپ شىعاردى. بۇل جوبا ەلىمىزدىڭ تاريحىنا قىسقاشا مۋلتيمەديالىق باعىتتاعى شولۋ بولىپ ەسەپتەلەدى. ەگەنمەندىك العان جىلداردان وسى كۇنگە دەيىنگى تاريحىمىزدى زاماناۋي تۇرعىدا تاعى ءبىر تۇگەلدەۋ»، - دەدى «قازكونتەنت» ا ق- نىڭ باسقارما ءتوراعاسى دۋمان قوجاحمەتوۆ.
ونىڭ سوزىنشە، جوبا جاڭا فورماتىمەن جانە جۇيەلىلىگىمەن ەرەكشەلەنەدى.
«سونداي-اق قىسقا ءارى نۇسقا تۇردە بەرۋگە تىرىستىق. سەبەبى ۇزاق تەكست پەن ۆيدەونى ەشكىمنىڭ كورگىسى كەلمەيدى. تاريح - بۇگىنىمىز بەن بولاشاعىمىز ءۇشىن قۇندى. ەلىمىزدىڭ تاريحى مەن ونىڭ استاناسىنىڭ قالىپتاسۋى تۇڭعىش پرەزيدەنت - ەلباسى نۇرسۇلتان نازاربايەۆتىڭ ەسىمىمەن تىعىز بايلانىستى. ەلباسىنىڭ قالا مەن ونىڭ دامۋى تاريحىنا سىڭىرگەن ەڭبەگى زور. وسى تۇرعىدا جاڭا جوبانىڭ ماڭىزى دا زور بولماق»، - دەدى ول.
الداعى ۋاقىتتا ۆەب-دەرەك جوباسى تاريحىمىزدا ورىن الاتىن ماڭىزدى وقيعالارمەن تولىقتىرىلىپ وتىرادى. جانە ونداعى نەگىزگى ەرەكشەلىك سايتتىڭ جۇيەلى جانە جاڭا فورماتتا بولۋى، سونداي-اق قىسقا ءارى نۇسقا ۇسىنىلۋىندا.
«جوبا 2016-جىلى قولعا الىنعان بولاتىن، ونىڭ جاسالۋىنا 10 ادام قاتىستى. ۆەب-دەرەكتەر سايتىندا ەلوردا تاريحىنا قاتىستى بۇرىن-سوڭدى جاريالانباعان 100 فوتو جاريالاندى. بۇل استانا جانە الماتى قالاسىنىڭ ارحيۆتەرىمەن بىرىگە جۇمىس ىستەۋىمىزدىڭ ناتيجەسى»، - دەدى د. قوجاحمەتوۆ.
