الەمنىڭ ەڭ ۇزدىك فۋتبول اكادەميالارى

 نۇر-سۇلتان. قازاقپارات - كەز كەلگەن فۋتبول كومانداسى قاتارلارىن جاس تالانتتى ويىنشىلارمەن تولىقتىرعىسى كەلەدى.

سەبەبى جاستار - كوماندانىڭ بولاشاعى. الپاۋىت كوماندالار جاس تالانتتى فۋتبولشىلار ءۇشىن قىرۋار قارجى شىعىنداۋعا دايىن. ودان كەلەر پايدا دا جوق ەمەس. بولاشاعى بارىن بايقاسا، كەيىنىرەك وزگە كومانداعا ساتۋدىڭ ءوزى كلۋب ءۇشىن ءتيىمدى.

ال كەي كوماندالاردىڭ ويىنشى الۋى ءۇشىن قاراجاتى جەتپەيدى-اق. ولار نە ىستەيدى؟ ءوز اكادەمياسىنىڭ تۇلەكتەرىنە جول اشادى. ولاي بولسا الەمنىڭ ەڭ ۇزدىك فۋتبول اكادەميالارىنا از-كەم توقتالا كەتەيىك.

«بارسەلونا» (يسپانيا)

بارسەلوناداعى بالالاردىڭ ءبىر ارمانى - قالا كومانداسىنىڭ اكادەمياسىنا وقۋعا ءتۇسۋ. ال وعان تۇسكەننەن كەيىن كوماندانىڭ نەگىزگى قۇرامىنا ىلىگۋ. 2012 -جىلى كوماندا ءبىر ويىنعا تەك ءوز اكادەمياسىنىڭ 11 ويىنشىسىمەن الاڭعا شىقتى. بۇل جوعارى - جەتىستىك. سوڭعى جىلدارى اكادەميادان جاس تالانتتى ويىنشىلار كوپ شىقپاعانمەن، بەدەلى تومەندەگەن ەمەس. سەبەبى بۇل مەكتەپتەن حاۆي، ينەستا، فابرەگاس، پۋيول سىندى فۋتبولشىلار تۇلەپ ۇشتى. ال مەسسيدىڭ ءجونى ءبىر بولەك.

«اياكس» (نيدەرلاند)

الەمدەگى ەڭ تانىمال فۋتبول اكادەميالارىنىڭ ءبىرى - «اياكس» كومانداسىنا تيەسىلى. نيدەرلاندىلىق كوماندانىڭ تاريحى دا باي. الەم تانىعان تالاي فۋتبولشىلار وسى اكادەميادان شىققان. «اياكس» ⅩⅩ عاسىردىڭ ەكىنشى شيرەگىندە ەۋروپاداعى ەڭ ۇزدىك كوماندالار قاتارىندا بولدى. چەمپيوندار كۋبوگى (قازىرگى چەمپيوندار ليگاسى) جارىسىندا 4 رەت توپ جاردى. بۇل جەتىستىككە ءوز اكادەمياسىنان شىققان ويىنشىلاردىڭ ەڭبەگى ءسىڭدى. قازىرگى تاڭدا كوماندا ەۋروپانىڭ ءىرى جارىستارىندا توپ جارىپ جۇرگەن جوق. ايتكەنمەن بيىل چەمپيوندار ليگاسىندا «رەالدى» جارىس جولىنان شىعارىپ، سەنساتسيا جاسادى. ال كوماندانىڭ قازىرگى تالانتتى ويىنشىلارىنا تانىمال كومماندالار «قۇدا ءتۇسىپ» ۇلگەردى. «اياكس» اكادەمياسى - ەۋروپاداعى تالانتتى ويىنشىلاردىڭ ورداسى دەپ باعالانادى. ترانسفەر كەزەڭىندە بۇل كوماندا بايىپ قالاتىنى دا جاسىرىن ەمەس.

«سانتوس» (برازيليا)

برازيليانىڭ «سانتوس» فۋتبول اكادەمياسى دا جاس تالانتتاردىڭ باعىن اشۋدا كوشتەن قالعان ەمەس. فۋتبول پاتشاسى پەلەنىڭ ءوزى وسى مەكتەپتە ءتالىم العان. ال قازىرگى نەيمار فۋتبول الىپپەسىن «سانتوستا» ۇيرەنگەن. برازيليالىق كوماندا نەگىزگى قۇرام ءۇشىن الاڭداماسى انىق. سەبەبى اكادەميادا تالانتتى ويىنشىلارى جەتەرلىك.

«سپورتينگ» (پورتۋگاليا)

پورتۋگاليادا ءبىر- بىرىنە باسەكەلەس كوماندالار اسا كوپ ەمەس. سوڭعى 10 جىلدا 3-4 كوماندا عانا تايتالاسىپ كەلەدى. تۋرنير كەستەسىندە عانا ەمەس، شاكىر تاربيەلەۋ ىسىندە دە. دەگەنمەن «سپورتينگتىڭ» اكادەمياسى ءبىر قادام الدا سانالادى. فيگۋ، كۋارەجما، ناني، موۋتينيۋ مەن رونالدۋ سىندى ويىنشىلار وسى اكادەميادا ءتالىم العان.

«مانچەستەر يۋنايتەد» (انگليا)

« قىزىل سويقانداردىڭ» اكادەمياسى دا ايرىقشا تالانتتاردى شىعارعان وردا. ءالى كۇنگە دەيىن كوپ كوماندالار بۇل كوماندانىڭ مەكتەبىنە كوز تىگەدى. اعىلشىنداردىڭ اتى اڭىزعا اينالعان ويىنشىلارى بوببي چارلتون مەن دجوردج بەست «مانچەستەر يۋنايتەد» اكادەمياسىنان شىققان. دەۆيد بەكحەم، پول سكوۋلز بەن اعايىندى نيەۆيللدەردى دە الەم مانكۋنياندىق كوماندا ارقىلى تانىدى.

«باۆاريا» (گەرمانيا)

ميۋنحەندىك كوماندا - گەرمانياداعى كوشباسشى ۇجىم. اكادەمياسى دا باسەكەلەستەرىنە ات وزدىرعان ەمەس. ينفراقۇرىلىمى جوعارى دەڭگەيدە دامىعان. شاكىرت تاربيەلەيتىن كاسىبي ماماندارى جەتكىلىكتى. بۇل اكادەميادان گەرمانيا قۇراماسىن ورگە سۇيرەگەن رۋممەنيگگە، بەككەنباۋەر، كەيىننەن شۆاينشتايگەر، كروسس، ميۋللەر سىندى ويىنشىلار شىقتى.

«سان-پاۋلۋ» (برازيليا)

«سان- پاۋلۋ» كلۋبىنىڭ اكادەمياسى دامىعان ورتالىق ىسپەتتى. شاعىن قالالاردا فۋتبولدى باستاعان جاس جەتكىنشەكتەر كوزگە تۇسسە، وسى اكادەمياعا كەلەدى. نەگىزىنەن برازيليانىڭ تابيعي كليماتى ناعىز فۋتبولعا ارنالعان دەسەك تە بولادى. كۇن جىلى بولاتىندىقتان جىل بويى دوپ تەۋىپ، شەبەرلىگىڭدى ارتتىرۋعا بولادى. بۇل اكادەميادان شىققان تانىمال فۋتبولشىلار قاتارىندا كافۋ، كاكا، وسكار سىندى فۋتبولشىلار بار.

 

Massaget.kz