استانالىق عالىم بەت تەرىسىن جاقسارتاتىن جاسۋشا ويلاپ تاپتى

None
None
نۇر-سۇلتان. قازاقپارات - ەلىمىزدە كوسمەتولوگيا سالاسىندا دا تىڭ جەتىستىكتەر از ەمەس. شەتەلدىك جوعارى وقۋ ورىندارىنىڭ تۇلەگى، عالىم بولات سۇلتانقۇلوۆ بىرنەشە جىلدان بەرى تەرى جاسۋشالارىن وسىرۋمەن اينالىسادى.

 ەلوردا مەن الماتىدا زاماناۋي زەرتحانالار اشىپ، وسى باعىتتى دامىتىپ جاتىر. بولات سۇلتانقۇلوۆ 6  جىلدان بەرى تەرى جاسۋشالارىن وسىرۋمەن اينالىسادى. بۇل - ونىڭ كۇندەلىكتى جۇمىس ورنى. عالىم زەرتحاناعا كىرەر بويدا ارنايى مەديتسينالىق كيىمدەرىن كيىپ، مۇقيات دەزينفەكسيا جاسايدى. سەبەبى مۇندا بارىنشا تازا بولۋى كەرەك. ال جاسۋشالار توڭازىتقىشتا ساقتالىپ، وزدىگىنەن كوبەيەدى. ءار جاسۋشا شامامەن 2 اي ءومىر سۇرەدى.

 بولات سۇلتانقۇلوۆ، گەنەتيك:

 - بۇل جاسۋشالاردى وسىرگەن سوڭ ءبىز كوسمەتولوگ دارىگەرلەرگە وتكىزەمىز. ولار ونى ادامنىڭ تەرىسىنە ەنگىزەدى. 12-18 ايدان كەيىن ەمدەلۋشىنىڭ تەرىسى جاقسارا تۇسەدى. جاڭا جاسۋشالار بەت تەرىسىن جاقسارتىپ قانا قويماي، تىرتىقتاردى كەتىرۋگە دە ىقپال ەتەدى. مەن ينستيتۋتتا ەڭبەك ەتىپ، عىلىممەن اينالىسىپ قانا قويماي، ۇنەمى ءوز ءىسىمدى قولعا الۋدى ويلايتىنمىن. ءبىرىنشى كەزەكتە زەرتحانا اشىپ، ەلىمىزدە وسى سالانى دامىتۋعا بولاتىندىعىن ءوز- وزىمە دالەلدەگىم كەلدى. ارينە، بۇل وڭاي ەمەس، ءبىراق قولدان كەلەتىن ءىس.

 بىلىكتى عالىم نەبارى 30 جاسىندا نوتتينگەم جانە پيتتسبۋرگ ۋنيۆەرسيتەتتەرىنىڭ تۇلەگى اتاندى. قازىر ول ارىپتەستەرىمەن بىرگە ءبىرقاتار جوبالاردى باستاپ كەتتى. سونىڭ ءبىرى - پوليمەر ءوندىرۋ. ونى ادامنىڭ بەت تەرىسىنە ەكسە، تەرىنى سول قالپىندا ساقتاپ قالۋعا بولادى. عالىمدار مۇنىمەن شەكتەلمەي، شاشتىڭ ءتۇسۋىن توقتاتۋ باعىتىندا دا زەرتتەۋ جۇمىستارىن قولعا العان.

www.24.kz

سوڭعى جاڭالىقتار