استانالىق ستۋدەنت نايزاعايدان قۋات الۋ جوباسىن ازىرلەۋدە

«مەنىڭ جوبام نايزاعايدان قۋات كۇشىن وندىرۋگە ارنالادى، بىزدە جەلدەن، كۇننەن قۋات وندىرىلەدى سول سەكىلدى. بۇل يدەيا ماعان استانادا ەكسپو- نى وتكىزگەن كەزدە كەلدى، مەن وندا ەرىكتى بولىپ جۇمىس ىستەگەم. 3 اي ىشىندە ەكسپو- دا ءتۇرلى ەنەرگيا قۋاتىنا قاتىستى ءتۇرلى جوبالارمەن تانىستىم. سودان سوڭ وسى سالا بويىنشا وتاندىق جوبا جاساۋدى قولعا الدىم. ارينە جوبا ۋاقىت پەن قارجىنى تالاپ ەتەدى. نايزاعاي تابيعات قۇبىلىسى بولعاندىقتان الدىمەن قاۋىپسىزدىكتى قامتاماسىز ەتۋ كەرەك»، - دەدى استانا قالاسى «تۇران- پروفي» كوللەدجىنىڭ ينجەنەر ماماندىعىنىڭ 3-كۋرس ستۋدەنتى التىنبەك نۇرداۋلەت.

 اۆتوردىڭ بولجامىنشا اتالعان جوبانى ەلىمىزدىڭ وڭتۇستىك- شىعىس ايماقتارىندا جۇزەگە اسىرۋ قولايلى، اسىرەسە الماتىدا سەبەبى ول تاۋلى ايماق. «نايزاعايدىڭ ءبىر رەت تۇسۋىنەن جارتى جىلعا جەتەتىن ەنەرگيا قۋاتىن ءوندىرىپ الۋعا بولادى. جوبانىڭ تاعى ءبىر ارتىقشىلىعى جاڭا جۇمىس ورىندارىمەن قامتاماسىز ەتەدى. ياعني ول جەردە ينجەنەردەن باستاپ داتچيككە دەيىنگى كوپتەگەن مامانداردىڭ كومەگى قاجەت ەتىلەدى. مىسالىعا الماتى قالاسىن الساق كوكتەمدە نايزاعاي ءجيى سوعاتىندىقتان ەكى- ءۇش رەت تۇسكەنى قالانى ءبىر جىلدىق توقپەن قامتاماسىز ەتۋگە جەتەدى دەپ بولجايمىن»، - دەيدى ول.

جوبانىڭ تاعى ءبىر ارتىقشىلىعى قۇرىلعىعا قاجەتتى ماتەريالداردىڭ بارلىعى وتاندىق ونىمدەر. «قازىرگى تاڭدا جوبانىڭ ماكەتى جاسالىپ جاتىر، الداعى 1-2 اي كولەمىندە دايىن بولىپ، تانىستىراتىن بولامىن. نايزاعايدان ەنەرگيا قۋاتىن الاتىن قۇرىلعىنىڭ بيىكتىگى 97 مەتر بولادى دەپ جوسپارلاۋدامىن»، - دەدى ا. نۇرداۋلەت.

ونىڭ ايتۋىنشا، قۇرىلعىعا نايزاعايدى تارتاتىن ارنايى ماگنيت ورناتىلاتىن بولادى، سول ارقىلى تابيعات قۇبىلىسىن وزىنە تارتادى. سونداي- اق، ونى جۇزەگە اسىرۋعا دەمەۋشىلەردىڭ قولداۋى قاجەت ەگەر تابىلماعان جاعدايدا اۆتور قارجى كوزىن ءوزى تاباتىنىن ايتىپ ءوتتى.

 ايتا كەتسەك، بۇگىن استانادا ق ر تۇڭعىش پرەزيدەنتى - ەلباسى كىتاپحاناسى مەن قالالىق ءبىلىم باسقارماسىنىڭ ۇيىمداستىرۋىمەن قالاداعى 35 كوللەدج ستۋدەنتتەرىنىڭ قاتىسۋىمەن «استانا جاستارى - قازاقستاننىڭ يندۋستريالدىق ستراتەگيالىق دامۋىندا» اتتى جاستار فورۋمى ءوتتى. اتالعان شارادا ءتۇرلى باعىت بويىنشا ىرىكتەلىنىپ الىنعان 7 جوبا قورعالدى.

www.24.kz