پاۆلوداردا جاس كەلىندەر سىنعا تۇسەدى

«بايقاۋ بەس كەزەڭنەن تۇرادى. ءبىرىنشى ءبولىم - «مەنىڭ وتباسىم - مەنىڭ باقىتىم» دەپ اتالادى. مۇندا ءار قاتىسۋشى ءوزىنىڭ قانداي كەلىن ەكەنىن كورسەتەتىن بەينەبايان ءتۇسىرۋى كەرەك»، - دەپ حابارلادى پاۆلودار وبلىسى جاستار ساياساتى ماسەلەلەرى جونىندەگى باسقارمانىڭ جاستار باستامالارىن دامىتۋ ورتالىعى.

 ەكىنشى بولىمىندە كەلىندەر شەبەرلىگىمەن سىنعا ءتۇسىپ، ءۇي تاپسىرماسىن ورىنداۋى شارت. ءار قاتىسۋشى الدىن- الا ازىرلەپ اكەلگەن ۇلتتىق تاعامىن بايقاۋ تورەشىلەرىنە ەكى مينۋت ىشىندە تانىستىرىپ شىعۋى كەرەك.

 «اس ءۇي بىلگىرى» دەپ اتالاتىن ءۇشىنشى بولىمىندە ءار قاتىسۋشى «قازاقشا» شاي قۇيۋ ءداستۇرىن كورسەتىپ، ءادىلقازىلار القاسىنىڭ كوڭىلىنەن شىعۋعا تىرىسادى. ءۇشىنشى ءبولىمنىڭ ەكىنشى كەزەڭىندە كەلىندەر نان جايۋ ارقىلى سىنعا تۇسەتىن بولادى»، - دەيدى ۇيىمداستىرۋشىلار.

 ەرەكشە بايقاۋدىڭ ءتورتىنشى ءبولىمى «باقىتتى انا» دەپ اتالادى. بۇل كەزەڭدە قاتىسۋشىلار بالانى بەسىككە بولەي وتىرىپ، بەسىك جىرىن ايتادى.

 «شىعارماشىلىققا كوبىرەك كوڭىل بولىنەتىن بەسىنشى كەزەڭدە كەلىندەر وزدەرىنىڭ شىعارماشىلىق قابىلەتتەرىن كورسەتە ءبىلۋى كەرەك. ءار كەزەڭ سايىن تومەن ۇپاي جيناعان ەكى قاتىسۋشى بايقاۋدان شىعارىلىپ وتىرادى»، - دەيدى ۇيىمداستىرۋشىلار.

 بايقاۋدىڭ بارلىق شارتتارىنان مۇدىرمەي وتكەن قاتىسۋشى «2019 -جىلدىڭ ۇزدىك كەلىنى» اتالىمىنا يە بولادى.

«2019 -جىلدىڭ ۇزدىك كەلىنى» بايقاۋى التىنشى ناۋرىز كۇنى، ساعات 14:00-دە پاۆلودار قالاسىنداعى جاستار باستامالارىن دامىتۋ ورتالىعىندا وتەدى. كەلىندەر دوداسىنا 29 جاسقا دەيىنگى پاۆلودار وبلىسىنىڭ جاس كەلىندەرى قاتىسا الادى.