وزگە ۇلت وكىلدەرى قازاق حالقىنا دەگەن العىسىن الەۋمەتتىك جەلى ارقىلى ايتىپ جاتىر
وسكەمەن. قازاقپارات - شىعىس قازاقستاندا تۇراتىن وزگە ۇلت وكىلدەرى العىس ايتۋ كۇنىنە وراي قازاق ۇلتىنا الەۋمەتتىك جەلى ارقىلى العىس جاۋدىرىپ جاتىر، دەپ حابارلايدى قازاقپارات ءتىلشىسى.
وتكەن عاسىردىڭ العاشقى جارتىسىندا شىعىس قازاقستان اۋماعىنا ءبىر ميلليونعا جۋىق ءتۇرلى ۇلت وكىلدەرى كۇشپەن كوشىرىلگەن بولاتىن. بۇگىندە سولاردىڭ ۇرپاقتارى ەل اۋماعىندا باقۋاتتى ءومىر سۇرۋدە. بۇگىنگى العىس ايتۋ كۇنىن پايدالانىپ، وزگە دياسپورا جاستارى قازاق حالقىنا سول قيىن شاقتا قولداۋ كورسەتكەنى ءۇشىن العىستارىن ايتىپ جاتىر.
«ۆكونتاكتە»، Facebook, Instagram جەلىلەرىندە قازاق ۇلتى مەن قازاقستان حالقىنا العىس ايتقان ۆيدەولار بىرىنەن سوڭ ءبىرى جۇكتەلۋدە.
«وتكەن عاسىرداعى رەپرەسسيا شىعىس قازاقستان جەرىنە ءبىر ميلليون ادامدى سىرتتان اكەلىپتى. سونىڭ اراسىندا مەنىڭ اتالارىم دا بولعان. سول قيىن شاقتا بىزگە كومەك قولىن سوزعان قازاق حالقىنا العىس ايتامىن. مەن ءوز بولاشاعىمدى قازاقستانمەن بايلانىستىرامىن. قازىر مەتاللۋرگ بولىپ جۇمىس ىستەيمىن. مەرەكە قۇتتى بولسىن!» - دەيدى ۇلتى تاتار ميحايل بايتەرياكوۆ.