قازاق ەلىنىڭ عارىش بايلانىسىنداعى الەۋەتى قانداي؟
استانا. قازاقپارات - عارىشتاعى قازاقستاندىق جەرسەرىكتەردىڭ بايلانىس قىزمەتى حالىقارالىق نارىققا شىعادى.
اسىرەسە وزبەكستان، قىرعىزستان جانە تاجىكستان مەملەكەتتەرىنىڭ بايلانىس سالاسىن باعىندىرۋعا باسىمدىق بەرىلەدى. قازىردىڭ وزىندە قىرعىزستاننىڭ كەيبىر بايلانىس وپەراتورلارى ءبىزدىڭ جەرسەرىكتىڭ قىزمەتىن پايدالانۋدا.
ال وزبەكستان تارابىمەن كەلىسسوزدەر جۇرگىزىلىپ جاتىر. ايتا كەتۋ كەرەك، عارىشتا قازاقستاننىڭ KazSat-2 جانە KazSat-3 دەگەن اتاۋمەن ەكى جەرسەرىگى ۇزدىكسىز جۇمىس ىستەپ تۇر. سپۋتنيكتەر اقمولا وبلىسىنداعى «اقكول» عارىشتىق بايلانىس ورتالىعىنان جانە الماتىداعى «كوكتەرەك» رەزەرۆتىك ورتالىعىنان باسقارىلادى.
بۇگىندە ولار بايلانىس سالاسىنداعى قازاقستاندىق 21 كومپانياعا قىزمەت ۇسىنادى. وسىنىڭ ارقاسىندا وتكەن جىلى KazSat-2 جەرسەرىگى 2,1 ميلليارد تەڭگە تابىس اكەلدى. ال KazSat-3 سپۋتنيگى 3,3 ميلليارد تەڭگە پايدا تاپقان. بيىل رەسپۋبليكالىق عارىشتىق بايلانىس ورتالىعىنىڭ ماماندارى قىزمەت كورسەتۋ اياسىن كەڭەيتىپ، كىرىس كولەمىن ارتتىرۋعا نيەتتى.
ال 2023 -جىلى عارىشتاعى KazSat-2 جەرسەرىگىن KazSat-2R جەرسەرىگىمەن اۋىستىرۋ جوسپارلانعان.
ديدار زارقۇموۆ، «ر ع ب و» ا ق جەتەكشى ينجەنەرى:
- عارىش اپپاراتتارىمىز بۇكىل قازاقستان اۋماعىن جانە سونىمەن قاتار كورشىلەس ورتالىق ازيا مەملەكەتتەرىن قامتۋدا. كەز كەلگەن وپەراتور ءوزىنىڭ انتەنناسىن اپارىپ، تاۋدىڭ ورتاسىنان بولسىن، كەز كەلگەن ايماققا قويىپ، ءبىزدىڭ سپۋتنيككە قاراتىپ، كەز كەلگەن بايلانىس ءتۇرىن قامتاماسىز ەتە الادى. قازىرگى كەزدە قىرعىزستان كوپ قولدانادى. ءبىزدىڭ وپەراتور ارقىلى ولار وزدەرىنىڭ انتەننالىق جۇيەلەرىن قويادى دا، سول ارقىلى ءبىزدىڭ عارىشتىق اپپاراتتارمەن جۇمىس ىستەۋدە.