استانالىقتار سيركتە ءۇندى پىلدەرى مەن قولتىراۋىنداردىڭ ونەرىن تاماشالايدى
باعدارلامادا جونگلەرلەر مەن اڭ ۇيرەتۋشىلەر، ەكۆيليبريستەر مەن اۋە گيمناستشىلارى، اكروباتتار مەن سايقىمازاقتار، سونداي- اق 85-تەن اسا جانۋار ونەر كورسەتەدى. ونىڭ ىشىندە تۇيە، پۋما، ارىستان، ءيت، لاما، پيتون، قولتىراۋىن، مايمىل، جايرا جانە اتتار مەن ءۇندى پىلدەرى بار.
بۇل جانۋارلاردىڭ اسەمدىگى ءتانتى ەتەدى. رانگو، پرەتتي جانە مارگو اتتى پىلدەر پيراميدا قۇرىپ، ەڭبەكتەيدى، بيلەيدى، شارعا تۇرادى، مۋزىكالىق اسپاپتاردا وينايدى، شەڭبەرلەر اينالدىرادى. سيرك ارتيستەرىنىڭ ونەرى اۆتورلىق مۋزىكانىڭ جانە ەرەكشە حورەوگرافيالىق قويىلىمداردىڭ سۇيەمەلدەۋىمەن وتەدى.
سيۋجەت بويىنشا ينديرا ەسىمدى قىز تۇسىندە جابايى تابيعات پەن ەكزوتيكالىق جانۋارلاردىڭ عاجاپ الەمىنە تۇسەدى. ول ەرتەگى كەيىپكەرلەرىن كەزدەستىرىپ، قىزىقتى ساياحاتقا اتتانادى.
كورەرمەندەر اڭىزعا اينالعان «پىلدەرمەن جەر ءجۇزىن اينالىپ شىعۋ ساياحاتى» اتتراكسيونىنىڭ كەيىپكەرلەرى كورنيلوۆتار اۋلەتىمەن تانىسادى. بۇل مانەجگە بىردەن ءۇش ءۇندى ءپىلى شىعاتىن الەمدەگى جالعىز قويىلىم.
ايتا كەتەيىك، اڭ ۇيرەتۋشى اندرەي مەن اناستاسيا دەمەنتيەۆتەر- كورنيلوۆتار ماسكەۋدە سيرك ونەرىنىڭ بۇكىلالەمدىك فەستيۆالىندە «التىن سىيلىعى»، سۆەتنوي بۋلۆارداعى نيكۋلين سيركىنىڭ حالىقارالىق سيرك ونەرى فەستيۆالىندە ءبىرىنشى ورىن جانە «التىن ءپىل» سىيلىعىن، يجيەۆسكىدە (ۋدمۋرتيا) حالىقارالىق سيرك فەستيۆالىندە التىن جۇلدە، رەسەي مەملەكەتتىك تسيرك كومپانياسىنىڭ «ۇزدىك اتتراكتسيون-2011» ءۇشىن «شاري- ۆاري» سىيلىعىن، رەسەي سيرك قايراتكەرلەرى وداعىنىڭ «ۇزدىك ارتيست-2012» سىيلىعىن (اندرەي دەمەنتيەۆ- كورنيلوۆ) جانە «ۇزدىك جىل اتتراكتسيونى-2015» نوميناتسياسىندا «شەبەر» سىيلىعىن، سونداي- اق تسۆەتنوي بۋلۆارداعى نيكۋلين سيركىنىڭ حالىقارالىق سيرك ونەرى فەستيۆالىنىڭ «التىن ءپىل» گران- ءپريىن يەلەنگەن.
سەنبى كۇنى، 23 - اقپاندا، ساعات 16:00-دە «ينديرا» پىلدەر سيركىنىڭ پرەمەراسى باستالادى.
وتكىزۋ ورنى: استانا قالاسى، «استانالىق سيرك» م ك ق ك، قابانباي باتىر داڭعىلى 5.