استانادا ىس پەن تۇتىننەن قورعايتىن قۇرىلعىلار قانشا ۇيگە ورناتىلادى؟

استانا. قازاقپارات - بۇگىندە استاناداعى سارىارقا اۋدانىندا جەكە تۇرعىن ۇيلەرگە ىس پەن تۇتىننەن قورعايتىن داتچيكتەر جانە گاز قۇرامىن انىقتايتىن قۇرىلعىلاردى ورناتۋ ءىسى جالعاسۋدا، دەپ حابارلايدى قازاقپارات.

«قازىرگى ۋاقىتتا 100 دەن استام ءۇيدى قامتۋدى جوسپارلاپ وتىرمىز. الدىن الا ەسەپ بويىنشا، وسىنداي شاعىن قۇرىلىس نىساندارى 400 دەن اسادى. ولار تەك سارىارقا اۋدانىندا عانا ەمەس، سونىمەن قاتار كوكتال-1 مەن كوكتال-2، اگروقالاشىق جانە جاقىن ماڭدا ورنالاسقان وزگە دە اۋماقتار جوسپارعا كىرىپ وتىر»، - دەدى اتالعان اكسيانىڭ باستاماشىسى ارمان قاشقىنبەكوۆ قازاقپارات تىلشىسىنە بەرگەن جاۋابىندا.

بەلگىلى بولعانداي، اكسيا 8- اقپان كۇنى باستالدى.

«كەشە كەشقۇرىم داتچيكتى تەك ءبىر ۇيگە عانا ورناتىپ ۇلگەردىك. بۇل جۇمىستار كەشكە قاراي باستالعاندىقتان، ءبىر ءۇي عانا قامتىلدى. بۇگىن تاڭەرتەڭنەن جۇمىستاردى جالعاستىرىپ جاتىرمىز. 9- اقپاندا شامامەن 10 ءۇيدى قامتۋدى جوسپارعا ەنگىزدىك»، - دەدى ول.

بۇل يگىلىكتى شارانىڭ باستاماشىلارى كۇتپەگەن پروبلەماعا تاپ بولعان.

«ءبىز ەلوردا دۇكەندەرىندە بولعان بارلىق قۇرىلعىنى ساتىپ الدىق. ەندى ءبىز قاجەتتى كولەمدەگى داتچيكتەردى تابا الماي وتىرمىز. ساتۋشىلاردىڭ ايتۋىنشا، ولار الماتىدا دا جوق ەكەن. ونى تەك نوۆوسىبىردەن الدىرۋ كەرەك. قازىر ەندى قۇرىلعىلاردى استاناعا جەتكىزۋ امالدارىن ويلاستىرىپ جاتىرمىز. دەگەنمەن، جوسپار بويىنشا 100 ءۇيدى قامتۋعا تىرىسامىز. مۇمكىن بولسا، ودان كوپ ۇيگە ورناتۋ نيەتىمىز بار»، - دەيدى ارمان قاشقىنبەكوۆ.

ونىڭ سوزىنە قاراعاندا، داتچيك ورناتۋ شارالارىن الداعى اپتادا تولىق اياقتاۋ كوزدەلىپ وتىر. بۇل جوبانىڭ ماقساتى - ۇيلەردى ورتتەن قورعاۋدىڭ وڭتايلى تاسىلدەرىن كورسەتۋ. بۇگىندە ءتۇتىن داتچيگى 1,8 مىڭ تەڭگە، گازعا تالداۋ جاساۋ قۇرىلعىسى 5 مىڭ تەڭگە تۇرادى.

«ءبىزدىڭ قانات-قاقتى جوبامىزعا باسقا دا بيزنەسمەندەر قولداۋ جاساپ جاتقانىن ەستىپ جاتىرمىز. بۇگىندە ولار ءوز وڭىرلەرىندە وسىنداي شارالاردى جۇرگىزۋگە نيەتتى، سەبەبى ول ايتارلىقتاي قيىن جۇمىس ەمەس. اتاپ ايتساق، قىزمەت ەتىپ جۇرگەن كەڭسەلەرىمىزدە داتچيكتەر ورناتىلعان جانە ءبىز ولارعا نازار اۋدارىپ جۇرگەن جوقپىز»، - دەدى ول.

ەستەرىڭىزگە سالا كەتەيىك، دجەنتەلمەندەر كلۋبىنداعى ارمان قاشقىنبەكوۆ پەن سانجاردىڭ دەمەۋشىلىك كومەگىمەن كوپبالالى وتباسىلاردىڭ، اۋدانداعى جەكە سەكتوردا تۇراتىن الەۋمەتتىك از قامتىلعان وتباسىلاردىڭ ۇيىنە ىس پەن تۇتىننەن قورعايتىن قۇرىلعى ورناتىلا باستاعان بولاتىن.