الماتى ستۋدەنتتەر ولەڭ وقۋدان باق سىنادى
مۇزبالاق اقىننىڭ تۋعان كۇنىنە ورايلاستىرىپ وتكەن جىر كەشىنە الماتى قالاسىنداعى ءبىرقاتار جوعارى وقۋ ورىندارىنىڭ ستۋدەنتتەرى قاتىسىپ، «مۇقاعالي ىزىمەن» جانە «ولەڭنەن توگىلگەن اسەم ءان» باعىتتارى بويىنشا ءوز ونەرلەرىن ورتاعا سالدى.
جىر پاديشاسىنىڭ تۋىندىلارى سونداي-اق، جاستاردىڭ جۇرەكجاردى شىعارمالارى ورىندالعان بايقاۋ قىزدار ۋنيۆەرسيتەتىنىڭ تاربيە جانە الەۋمەتتىك جۇمىستار جونىندەگى دەپارتامەنتى مەن «اق قاۋىرسىن» جاس اقىندار كلۋبىنىڭ مۇرىندىق بولۋىمەن ۇيىمداستىرىلدى.
ادەبي سايىسقا اقىن، قازاقستان جازۋشىلار وداعى باسقارما ءتوراعاسىنىڭ ورىنباسارى باقىت بەدەلحان ۇلى، ع. مۇسىرەپوۆ اتىنداعى اكادەميالىق بالالار جانە جاسوسپىرىمدەر تەاترىنىڭ اكتەرى اسەت يمانعالي، ءانشى، كومپوزيتور، قازاقستان رەسپۋبليكاسىنىڭ ەڭبەك سىڭىرگەن ءارتىسى مارات وماروۆ، ءانشى، كومپوزيتور ەرالى كوشەربايەۆ جانە اقىن باتىرحان سارسەنحان قازىلىق جاسادى.
پەداگوگيكالىق وقۋ ورنىنىڭ قابىرعاسىندا تۇڭعىش رەت ءوتىپ وتىرعان بايقاۋعا 30 جاس اقىن مەن 30 ءانشى قاتىسۋعا ءوتىنىش بىلدىرگەن. ونىڭ ىشىندە ەكى باعىت بويىنشا 20 ونەرپاز ىرىكتەلىپ الىندى. ولاردىڭ قاتارىندا ءال- فارابي اتىنداعى قازاق ۇلتتىق ۋنيۆەرسيتەتى، اباي اتىنداعى قازاق ۇلتتىق پەداگوگيكالىق ۋنيۆەرسيتەتى، قازاق ۇلتتىق اگرارلىق ۋنيۆەرسيتەتى، قازاق ۇلتتىق قىزدار پەداگوگيكالىق ۋنيۆەرسيتەتى مەن ابىلاي حان اتىنداعى قازاق حالىقارالىق قاتىناستار جانە الەم تىلدەرى ۋنيۆەرسيتەتىنىڭ ستۋدەنتتەرى بار.
قاتىسۋشىلار «ولەڭنەن توگىلگەن اسەم ءان» جانە «مۇقاعالي ىزىمەن» باعىتتارى بويىنشا ءوز ونەرلەرىن ورتاعا سالدى. سايىسكەرلەر ءبىرىنشى باعىتتا ماقاتايەۆتىڭ سوزىنە جازىلعان اندەردى ورىنداسا، ەكىنشى باعىت بويىنشا قاتىسۋشىلار ۇلى اقىننىڭ ولەڭدەرىن ناقىشىنا كەلتىرە ايتىپ، ارناۋ جىرلارىن وقىدى.
جيىندا تاربيە جانە الەۋمەتتىك جۇمىستار جونىندەگى دەپارتامەنتىنىڭ ديرەكتورى جاڭاگۇل سۇلتانوۆا ءسوز سويلەپ، مۇزبالاق جىر شايىرىنىڭ شىعارمالارىن وسكەلەڭ ۇرپاق اراسىندا كەڭىنەن ناسيحاتتاۋ ماقساتىندا قولعا الىنعان يگىلىكتى ءىستىڭ الداعى ۋاقىتتا داستۇرگە اينالاتىنىنا سەنىم ءبىلدىردى.
«مۇقاعالي - عۇمىرىنىڭ سوڭىنا دەيىن شىعارماشىلىقتان الىستاماي، قولىنان قالامى تۇسپەي، قازاقتىڭ قارا ولەڭىنىڭ قۇدىرەتى مەن سىرىنا مولىنان قانىققان اقىن. ولەڭ كيەسىنىڭ ءمانى مەن ماعىناسىنا تەرەڭ بويلاپ، ءسوز مارجانىن كەلىستى كەستەلەي بىلگەن ماقاتايەۆ مۇرالارى قازاق ادەبيەتىنە قوسىلعان باعا جەتپەس تۋىندىلار.
تۋادى، تۋادى ءالى ناعىز اقىن،
ناعىز اقىن بال مەن ۋ تامىزاتىن.
جەسىردىڭ ايىرىلماس سىرلاسى بوپ،
جەندەتتىڭ كوزىنەن جاس اعىزاتىن، دەپ جىرلاعان مۇقاعالي ءوزى دە قازاقتىڭ قارا ولەڭىنىڭ حانتاڭىرىنە اينالىپ وتىر، بۇگىندە. جالىنداعان جاستاردىڭ پوەزياعا دەگەن قۇشتارلىعىن ارتتىرۋ ورايىنداعى تاعىلىمدى شارا ومىرشەڭ بولادى دەپ ويلايمىن، - دەدى جاڭاگۇل سۇلتانوۆا.
تارتىستى وتكەن بايقاۋ قورىتىندىسىندا كىل جۇيرىكتىڭ ىشىنەن شىن جۇيرىكتى انىقتاۋ وڭاي بولعان جوق. دەسە دە «ولەڭنەن توگىلگەن اسەم ءان» باعىتى بويىنشا باس جۇلدە قىزدار ۋنيۆەرسيتەتىنىڭ ستۋدەنتى التىناي جاڭگىردىڭ قانجىعاسىندا كەتتى. ءبىرىنشى ورىنعا ءال- فارابي اتىنداعى قازاق ۇلتتىق ۋنيۆەرسيتەتىنىڭ ستۋدەنتى ەدىل جەتپىسوۆ يە بولسا، ەكىنشى ورىن قازاق ۇلتتىق ۋنيۆەرسيتەتىنىڭ ستۋدەنتى ايەركە سايرانعا بۇيىردى. ال قىزدار ۋنيۆەرسيتەتىنىڭ ستۋدەنتى ارۋجان ناسىروللانوۆا ءۇشىنشى ورىنعا قول جەتكىزدى.
«مۇقاعالي ىزىمەن» اقىندار جارىسىندا ءال-فارابي اتىنداعى قازاق ۇلتتىق ۋنيۆەرسيتەتىنىڭ ستۋدەنتى شاديار ەسەنالىنىڭ جۇلدىزى جانىپ، جەڭىس تۇعىرىنان كورىندى. وسى باعىت بويىنشا ءبىرىنشى ورىنعا قىزدار ۋنيۆەرسيتەتىنىڭ ستۋدەنتى لاۋرا جاڭاباي، ەكىنشى ورىنعا قازاق ۇلتتىق ۋنيۆەرسيتەتىنىڭ ستۋدەنتى نۇركەن قۇماربەك جانە ءۇشىنشى ورىنعا اباي اتىنداعى قازاق ۇلتتىق پەداگوگيكالىق ۋنيۆەرسيتەتى ورالباي مىرزاقۇلوۆ يە بولدى.
جۇلدەگەرلەر مەن جەڭىمپازدارعا قازاق ۇلتتىق قىزدار پەداگوگيكالىق ۋنيۆەرسيتەتىنىڭ رەكتورى گاۋحار الدامبەرگەنوۆانىڭ العىس حاتى مەن ديپلومى تابىستالىپ، باعالى سىيلىقتار بەرىلدى.