قازاقستان بيىل قانشا ۋران وندىرەدى
استانا. قازاقپارات - قازاقستان بيىل 23 مىڭ تونناعا جۋىق ۋران وندىرەدى. بۇل تۋرالى بۇگىن ق ر ەنەرگەتيكا مينيسترلىگىنىڭ كەڭەيتىلگەن القا ماجىلىسىندە ۆەدومستۆو باسشىسى قانات بوزىمبايەۆ ايتتى، دەپ حابارلايدى قازاقپارات ءتىلشىسى.
«ۋراننىڭ الەمدىك نارىقتاعى كۇردەلى جاعدايىنا قاراماستان ءبىز ۋران سالاسىندا ونى ءوندىرۋشى كوشباسشى پوزيتسيامىزدى ساقتاپ قالۋعا نيەتتىمىز. قازىرگى ۋاقىتتا ۋران ۇسىنىسىنىڭ ارتىق ەكەندىگى بايقالادى جانە بۇل ترەند جالعاسىپ وتىر. جوسپارلى كورسەتكىشكە ساي 21699 توننا ۋران ءوندىرىلدى. بۇل جىلعى ۋران ءوندىرۋ جوسپارى - 22742 توننا» ، - دەدى ول.
ونىڭ ايتۋىنشا، ايتارلىقتاي مول ۋران قورىنىڭ بولۋى - قازاقستاننىڭ باسىمدىعى سانالادى. سوندىقتان يادرولىق وتىن تسيكلىنىڭ بارلىق نەگىزگى سەگمەنتتەرىن دامىتۋ ارقىلى اتوم سالاسىنىڭ جالپى قوسىلعان قۇنىن ارتتىرۋ جانە وزىندىك رەسۋرستىق بازانى بارىنشا قولدانىلاتىن اتوم ەنەرگەتيكاسىن قۇرۋ - مينيسترلىكتىڭ باستى ماقساتى بولۋى ءتيىس. وسى رەتتە ق. بوزىمبايەۆ ءوز ورىنباسارىنا ناقتى تاپسىرما جۇكتەدى.
«ۆيتسە- مينيستر سۇڭعات ەسىمحانوۆ پەن اتوم ەنەرگەتيكاسى جانە ونەركاسىپ دەپارتامەنتىنىڭ ديرەكتورى باتىرجان قاراكوزوۆ اعىمداعى جىلدىڭ ءبىرىنشى جارتىجىلدىعىندا اتوم سالاسىنداعى ازاماتتىق- قۇقىقتىق جاۋاپكەرشىلىك ماسەلەلەرى بويىنشا زاڭناماعا وزگەرىستەر ەنگىزۋدى قامتاماسىز ەتۋى ءتيىس» ، - دەدى ق. بوزىمبايەۆ.