قازاقستاندىق الىپ كۇش يەسى بار بىلگەنىن وقۋشىلارعا ۇيرەتپەك
«قازىرگى ۋاقىتتا اقمولا وبلىسىمەن بىرلەسكەن جوبانى ىسكە اسىرعالى جاتىرمىز. ەگەر اقمولا وبلىسى مەنى قولداسا، ءوڭىردىڭ ەلۋگە تارتا مەكتەبىن ارالاپ، شەبەرلىك ساعاتتارىن وتكىزگىم كەلەدى. ول مەكتەپتەردە وقۋشىلارعا ءوزىمنىڭ قارىم-قابىلەتىمدى پاش ەتىپ، قازاقستاندا قارا كۇشكە يە بولۋ مادەنيەتىن ۇيرەتكىم كەلەدى»، - دەدى ول Sputnik قازاقستان باسپا ءسوز ورتالىعىندا وتكەن جيىندا.
سەرگەي تسىرۋلنيكوۆ جۇرگەن جەرىندە قازاقتان شىققان باتىرلار مەن بالۋانداردى اۋزىنان تاستامايتىنىن ايتادى.
«ءبىز بالۋان شولاق پەن قاجىمۇقاندى عانا ايتىپ قويماي، قوبىلاندى، قابانباي مەن رايىمبەك باتىرلاردىڭ ەرلىگىن ۇرپاق ساناسىنا سىڭىرسەك دەيمىز. سەبەبى، ۇرپاق تاربيەسىندە ءبىز باتىر بابالارىمىزدىڭ ەل ءۇشىن ەتكەن ەڭبەگىن شامشىراق ەتە ءبىلۋىمىز كەرەك. مەن ول باتىرلاردىڭ قاتارىنا باۋىرجان مومىش ۇلىن دا قوسامىن» - دەيدى ول.
الىپ كۇش يەسى شاماسى كەلسە، قازاقستانداعى بۇكىل مەكتەپتى ارالاعىسى كەلەدى. الايدا بۇل ءۇشىن سەرگەيگە قارجىلاي قولداۋ كەرەك. ال قازىرگى ۋاقىتتا ەل ارالاۋ جۇمىسىن بالۋان باتىر ءوز اقشاسىمەن اتقارىپ ءجۇر. قازىردىڭ وزىندە كوپتەگەن وقۋشىلار الەۋمەتتىك جەلىدە سەرگەيمەن كەزدەسۋگە نيەت بىلدىرەتىن كورىنەدى.
«مەن ۆولونتەر سەكىلدى ەڭبەك ەتەمىن. بارلىق نومىرلەرىم ءوز قاراجاتىم ارقىلى جۇزەگە اسادى. رەكوردتار مەن مەكتەپ ارالاۋعا كەتەتىن شىعىنداردىڭ ءبارىن ءوزىم كوتەرەمىن. بۇل ءىستى شامام جەتكەنشە جالعاستىرا بەرەم»، - دەيدى رەكوردسمەن.
ەسكە سالا كەتسەك، وتكەن جىلدىڭ مامىر ايىندا سەرگەي تسىرۋلنيكوۆ سالماعى 148 توننالىق ۆاگون تىركەۋلى تەپلوۆوزدى بىرنەشە مەترگە سۇيرەپ اپارىپ، رەكورد ورناتقان بولاتىن.
ال وتكەن جىلدىڭ سوڭىندا قازاقستان مەن رەسەيدىڭ ءوڭىرارالىق ىنتىماقتاستىعىنىڭ XV فورۋمىندا اقمولالىق پالۋان رەسەي فەدەراتسياسىنىڭ پرەزيدەنتى ۆلاديمير پۋتينگە ەكى ەل دوستىعىنىڭ سيمۆولى رەتىندە ورىلگەن شەگەلەردى سىيعا تارتقان ەدى.