زەينەتكەر ايەلدى ۇرىپ، تەلەفونىن تارتىپ اكەتكەن قاراقشى ۇستالدى

ورال. قازاقپارات - ورالدا ءتارتىپ ساقشىلارى زەينەتكەر ايەلدى توناپ كەتكەن قاراقشىنى ۇستادى، دەپ حابارلايدى قازاقپارات ءتىلشىسى.

ب ق و پوليتسيا دەپارتامەنتىنىڭ باسپا ءسوز قىزمەتىنەن تۇسكەن مالىمەتكە قاراعاندا، وقيعا 4 -اقپان كۇنى شامامەن ساعات 17.00-دە گاگارين كوشەسى 99 -ءۇيدىڭ ماڭىندا ورىن الدى.

كىسى توناۋ وقيعاسى بەينەباقىلاۋ كامەراسىنا ءتۇسىپ قالعان. بەينەجازبادان ەر ادام ءۇيدىڭ جانىنداعى ورىندىقتا وتىرعان ايەلدىڭ قاسىنا كەلىپ، اڭگىمەلەسىپ وتىرعانى، سودان كەيىن وعان بىرنەشە رەت سوققى جاساپ، تەلەفونىن تارتىپ اكەتكەنى انىق كورىنەدى.

دەپارتامەنتتىڭ باسپا ءسوز حاتشىسى ءاليا ناۋرىزعاليەۆانىڭ ايتۋىنشا، ەر ادام كۇش كورسەتىپ، 1945 -جىلعى ايەلگە تيەسىلى «Homtom HT16» ۇيالى تەلەفونىن تارتىپ العان دا، تايىپ تۇرعان.

پوليتسيا قىزمەتكەرلەرى بەينەباقىلاۋ كامەراسىنىڭ كومەگىمەن وسى قىلمىسقا كۇدىكتى رەتىندە 1981 -جىلعى ەر ادامدى انىقتاپ، قولعا ءتۇسىردى.

«كەيىن ول ۋاقىتشا وقشاۋلاۋ يزولياتورىنا قامالدى. قازىرگى كەزدە ق ر ق ك 191-بابى 2-بولىگىنە سايكەس (كىسى توناۋ) تەرگەۋ امالدارى جۇرگىزىلۋدە»، دەدى قازاقپارات تىلشىسىنە ءا. ناۋرىزعاليەۆا.

ايتا كەتەيىك، اتالعان باپ بويىنشا قىلمىسى دالەلدەنگەن جاعدايدا كۇدىكتى مۇلكى تاركىلەنىپ، ءۇش جىلدان جەتى جىلعا دەيىنگى مەرزىمگە باس بوستاندىعىن شەكتەۋگە نە سول مەرزىمگە باس بوستاندىعىنان ايىرۋعا جازالانادى.