اقمولالىق سەمسەرلەسۋشى قازاقستان چەمپيونى بولدى
بۇل جايىندا اقمولا وبلىستىق دەنە تاربيەسى جانە سپورت باسقارماسىنىڭ باسپا ءسوز قىزمەتىنەن ءمالىم ەتتى، دەپ حابارلايدى قازاقپارات ءتىلشىسى.
«الماتىدا كادەتتەر اراسىندا سەمسەرلەسۋدەن رەسپۋبليكا چەمپيوناتى ءوتتى. مەدال يەلەنىپ، ەلىمىزدىڭ قۇراما ساپىنىڭ قاتارىنا كىرۋ ءۇشىن رەسپۋبليكانىڭ كوپتەگەن وبلىسىنىڭ سپورتشىلار باق سىنادى. تارتىستى وتكەن جەكپە-جەكتەر بارىسىندا اقمولا وبلىسىنىڭ سپورتشىلارى لايىقتى ونەر كورسەتە الدى»، - دەلىنگەن تاراتىلعان اقپاراتتا.
سونىمەن قاتار باسقارما مالىمەتىنشە، اقمولالىق الەكساندر ساۆين سەمسەرلەسۋدەن قازاقستان چەمپيونى اتانسا، ەلنۇر تولەگەنوۆ قولا مەدال يەلەنگەن. ەلنۇر تولەگەنوۆتىڭ ايتۋىنشا، بارلىق قارسىلاستار جوعارى دەڭگەيدە سەمسەرلەسكەن.
«ءاربىر جەكپە-جەك وڭاي بولعان جوق. جەڭىسكە جەتۋ ءۇشىن ءبىراز كۇش جۇمساۋعا تۋرا كەلدى. وكىنىشكە وراي، قارسىلاسىما لايىقتى توتەپ بەرە المادىم. ول مەنەن كۇشتى ءارى جىلدام بولدى. ەندى قارىمتا جەكپە-جەككە دايىندالاتىن بولامىن. كەلەسى جارىستا مۇنان دا جاقسى ونەر كورسەتەمىن دەپ ويلايمىن»، - دەدى ە. تولەگەنوۆ.