ۇسىك شالعان ادامعا قالاي كومەك كورسەتۋ كەرەك - ماماندار كەڭەسى

قوستاناي. قازاقپارات - قوستاناي وبلىسىندا اۋا رايىنىڭ كۇرت قۇبىلۋى كۇن تارتىبىنەن تۇسكەن جوق.

سوعان بايلانىستى قوستاناي وبلىسىنىڭ ت ج د ۇسىك شالعان ۋاقىتتا العاشقى كومەك كورسەتۋ جولدارىن ءتۇسىندىرىپ، اياز كەزىندە ادام ءوزىن قالاي ساقتاندىرۋ كەرەكتىگىن ەسكە سالادى، دەپ حابارلايدى قازاقپارات.

ۆەدومستۆودا ايتىلعانداي، شامادان تىس سۋىق ءوتۋ نەمەسە ءۇسۋ ادام ورگانيزمىنە تومەنگى تەمپەراتۋرانىڭ جالپى اسەر ەتۋ سالدارىنان پايدا بولىپ، ونىڭ نەگىزگى فيزيولوگيالىق جۇيەلەرى قىزمەتتەرىنىڭ، ەڭ الدىمەن دەنە جىلىلىعىن رەتتەۋ قىزمەتىنىڭ بۇزىلۋىنا اكەلەدى.

«ءۇسۋدىڭ 4 دارەجەسى بار. ءبىرىنشى دارەجەلى ءۇسۋ كەزىندە تەرىنىڭ سەزىمتالدىعى ناشارلاپ بوزارادى، ۇسىگەن جەر ىسىنەدى، اۋىرىپ قىشيدى.

ەكىنشى دارەجەلى ءۇسۋ ءبىرشاما اۋىر وتەدى، تەرىنىڭ استى سۋلانىپ كۇلدىرەيدى. ءۇشىنشى دارەجەلى ءۇسۋ تۇرىندە تەرىنىڭ استىنا قاندى سۋ جينالىپ، كۇلدىرەيدى، بىرنەشە كۇننەن سوڭ ولاردىڭ ورنى جانسىزدانىپ، جارىلادى دا، تىرتىق پايدا بولادى.

ءتورتىنشى دارەجەلى ءۇسۋ كەزىندە بارلىق جۇمساق تىندەر، كەيدە ءتىپتى سۇيەك تىندەرى دە جانسىزدانادى. بۇل - ءۇسۋدىڭ ەڭ اۋىر ءتۇرى. جانسىزدانعان جەر تىرىسىپ كەۋىپ قالادى، قارا قوڭىر تۇسكە بويالادى»، - دەپ ءتۇسىندىردى قوستاناي وبلىسىنىڭ ت ج د وكىلدەرى.

مامانداردىڭ سوزىنشە، ۇسىك شالعان جەرلەردى قارمەن ۋقالاۋ تەرىنىڭ زاقىمدالۋىنا اكەپ سوعادى جانە ينفەكسيا تۇسىرەدى. سۋىق تيگەن ادام جىلىنۋ ءۇشىن الكوگول ىشۋگە بولمايدى. سەبەبى، قان تامىرلارى كەنەت تارىلادى، ول تيىسىنشە، زاقىمدانعان جەرلەردى وتتەگىمەن قامتاماسىز ەتۋدى تومەندەتەدى.

«ۇسىك شالعان جەرلەردى مايمەن سىلاۋعا تىيىم سالىنادى، ويتكەنى ول تەرىنىڭ دەمالۋىن بۇزادى جانە زاقىمدانعان ۇلپالاردىڭ شىعۋىنا كەدەرگى بولادى. ۇسىك شالعان تەرى قولمەن نەمەسە توقىما شارفپەن سىلانادى. اۋەلى، ۇسىگەن ادامنىڭ قولعابىن جانە اياق كيىمىن شەشىڭىز، جۇمساق ماسساجبەن جىلىتىڭىز، ال اياقتارىڭىزدىڭ تابانىن جوعارىدان تومەن باعىتتا سىلاڭىز. زاقىمدانعان تەرىنى مۇمكىندىگىنشە داكەمەن، مارلەمەن، پوليەتيلەنمەن بىرنەشە قاباتتاپ وراڭىز جانە جىلى ءۇي-جايعا دەيىن تەز جەتۋگە تىرىسىڭىز. ءوزىڭىز تەز ارادا نەمەسە كورشىلەردىڭ كومەگىمەن دارىگەر شاقىرتىڭىز. داكەنى شەشپەڭىز، ايتپەسە تەمپەراتۋرانىڭ تومەندەۋى ناتيجەسىندە ۇلپاداعى دۇرىس قان اينالىم بۇزىلادى»، - دەپ ءتۇسىندىردى.

ءوز كەزەگىندە، «قازگيدرومەت» ر م ك فيليالى سۋىق اۋا تەمپەراتۋراسى قوستاناي وبلىسىنداعى ءالى ءبىراز ساقتالاتىنىن ەسكەرتەدى.

«وتكەن تاۋلىكتە ەڭ تومەنگى اۋا تەمپەراتۋراسى -22-28 گرادۋس بولدى. بۇگىن ول -33-38 گرادۋسقا دەيىن تۇسەدى دەپ كۇتىلۋدە. وبلىستىڭ كەي وڭىرلەرىندە -40-43 گرادۋس اياز سەزىلەدى. 6-7 -اقپان كۇندەرى دە تومەن اۋا تەمپەراتۋراسى بولادى»، - دەدى فيليال ديرەكتورى لاريسا كۋزمينا.

بۇعان دەيىن حابارلاعانىمىزداي، قاردىڭ قالىڭ ءتۇسۋى مەن بورانعا بايلانىستى ءۇش وبلىستىڭ اۋماعىنداعى رەسپۋبليكالىق جولدا كولىك قوزعالىسىنا شەكتەۋ ەنگىزىلدى.