بەس بالانىڭ ءومىرىن جالماعان ءورت نەدەن شىقتى

استانا. قازاقپارات - ق ر ىشكى ىستەر ۆيتسە- ءمينيسترى يۋري يلين بەس قىزدىڭ ءومىرىن قيىپ كەتكەن قايعىلى وقيعانىڭ الدىن الا سەبەبىن جاريالادى، دەپ حابارلايدى قازاقپارات ءتىلشىسى.

ونىڭ ايتۋىنشا، ءورت شىققان قۇرىلىس نىسانى ۋاقىتشا تۇرۋعا ارنالعان. ول جەردە تۋرا سونداي بىرنەشە نىساندار بار. يەسى - قايتىس بولعان بالالاردىڭ اناسىنىڭ ۇلكەن اپاسى.

«الدىن الا قورىتىندىعا سايكەس، بالالار ءيىس ءتيىپ، قايتىس بولعان. بۇل دەگەنىمىز، ءۇيدىڭ توبەسى وپىرىلىپ قۇلاعاندا بارلىعى ەس- ءتۇسسىز جاتقان» ، - دەدى يۋ. يلين جۋرناليستەرگە بەرگەن سۇحباتىندا.

ۆيتسە- ءمينيستردىڭ سوزىنە قاراعاندا، قايعىلى جاعدايعا تاپ بولعان وتباسىنىڭ تۋىستارى جارتى ساعات بۇرىن بالالاردى كورىپ كەتكەن. پەش تە دۇرىس ىستەپ تۇردى. ال تۇنگى ساعات 2:34 كورشىلەر ءورت ءسوندىرۋ قىزمەتىنە حابار بەرگەن.

«ءورت نەدەن شىقتى؟ دالاعا شىعاتىن مۇرجانىڭ اسبەست قاپتاسى بولماعان. سودان اعاش شاتىر ورتتەندى. قازىر ارنايى زەرتحانا جۇمىس ىستەپ جاتىر. سونىڭ قورىتىندىسى بويىنشا ناقتى سەبەپتەر بەلگىلى بولادى» ، - دەپ اتاپ كورسەتتى يۋ. يلين.

ايتا كەتەيىك، 4 - اقپان كۇنى تۇندە ەلوردانىڭ سارىارقا اۋدانىنداعى كوكتال-1 تۇرعىن الابىندا ءورت شىقتى. ءورتتى ءسوندىرۋ بارىسىندا 2006, 2008, 2014, 2016, 2018 -جىلى دۇنيەگە كەلگەن 5 بالانىڭ دەنەسى تابىلدى. ەڭ كىشىسى نەبارى ءۇش ايلىق ءسابي ەدى.

ءورت كەزىندە بەس بالانىڭ اتا- اناسى تۇنگى جۇمىستا بولعان.

ءۇيدىڭ وتاعاسىن تۇنگى ۋاقىتتا جۇمىس بەرۋشىسى شاقىرىپ العان.