يلون ماسك عالامشارارالىق كەمەنىڭ قوزعالتقىشىن سىناقتان وتكىزدى
ول ءوزىنىڭ Twitter پاراقشاسىندا Starship عارىش كەمەسىنە ارنالعان Raptor زىمىران قوزعالتقىشىنىڭ ءبىرىنشى رەت ىسكە قوسىلۋى ءساتتى وتكەنىن جازعان. وسىعان بايلانىستى يلون ماسك SpaceX كومانداسىنا تابىستى جۇمىس ءۇشىن العىس ءبىلدىردى.
ماسك قۇبىردان شىعىپ جاتقان وت تۇسىرىلگەن بەينەجازبانى جاريالاعان. كورسەتىلگەندەي، سىناق تەحاستاعى زاۋىتتا وتكەن.
Raptor قوزعالتقىشىن كومپانيا بىرنەشە جىل بويى دايىنداعان بولاتىن. الايدا، وتكەن جىلدىڭ جەلتوقسان ايىندا ماسك جاڭا ديزايندا ونىڭ مۇلدە جاڭا نۇسقاسى پايدا بولعانىن حابارلادى. SpaceX نەگىزىن قالاۋشى قوزعالتقىشتى مودەرنيزاتسيالاۋ ايعا ۇشۋ مەرزىمىن جاقىنداتا تۇسەتىنىنە ۇمىتتەنەتىن ايتقان بولاتىن. ماسك مۇنداي ساياحات 2023 -جىلى جۇزەگە اسىرىلاتىنىن مالىمدەسە، جاپونيالىق ميللياردەر يۋساكۋ ماەزاۆا ايدى اينالىپ ۇشۋعا باعىتتالعان بۇل ەرەكشە ساياحاتقا بيلەت ساتىپ الىپ قويعان.
ماسك ودان ءارى ءوز زىمىرانىمەن مارسقا دەيىن ۇشىپ بارىپ، جەر بەتىندە جاھاندىق سوعىس تۋىنداعان جاعدايدا قاجەت بولاتىن باسپانا سالۋدى جوسپارلاپ وتىر. الايدا، بيزنەسمەن مۇنداي ساياحاتتىڭ قاتەرى كوپ ەكەنىن دە مويىندادى.