پەتروپاۆلدىق ءورت ءسوندىرۋشى ەرەكشە كوللەكسيا جينادى

ونىڭ ۇيىندە ءتۇرلى كاسكالاردىڭ جيىرمادان استام ءتۇرى ساقتاۋلى، دەپ حابارلايدى قازاقپارات ءتىلشىسى.

بولاتجان اسقاربەكوۆتىڭ ايتۋىنشا، كوللەكسيا جيناۋعا اۋەستىك ەلىمىزدە 1936-1952 -جىلدارى قولدانىستا بولعان ءورت ءسوندىرۋ كاسكاسىنان باستالعان. وتە ناشار كۇيدە تابىلعان باس كيىمدى تازالاپ، بوياپ، قالپىنا كەلتىرىپتى. قازىر توپتاماسىندا مۇنداي كاسكالاردىڭ 22 سى بار. گەرمانيا، بەلارۋس، رەسەي،  ۇلى بريتانيا مەن امەريكا، ءۇندىستان، چەحيا - الەم ەلدەرىنىڭ ءورت ءسوندىرۋ شلەمدەرىنىڭ ءبىرىن وعان سىيعا تارتسا، ەندى ءبىرىن، مىسالى، ۇندىلىك ءورت سوندىرۋشىلەردىڭ شەرۋلىك كاسكاسىن ينتەرنەت ارقىلى ساتىپ العان.

«مەن كوللەكسيا جيناۋدى جاڭا باستاعاندار قاتارىنانمىن. ەلىمىزدە ءورت ءسوندىرۋ قىزمەتىنە قاتىستى بۇيىمداردى جينايتىن ادامدار كوپ ەمەس، ەكى- ۇشەۋ عانا. مەن ولارمەن حابارلاسىپ تۇرامىن. «سەنىڭ قولىڭنان كەلەدى، كوزىڭدە وت، ەڭ باستىسى قىزىعۋشىلىعىڭ جوعارى» دەپ مەنى قولداپ وتىرادى. كەي بۇيىمداردى ءبىر-بىرىمىزبەن الماسىپ جاتامىز»، - دەيدى پەتروپاۆل قالاسىنىڭ تۇرعىنى.

بولاتجان اسقاربەكوۆتىڭ ءورت ءسوندىرۋ قىزمەتىندە ەڭبەك ەتىپ جاتقانىنا جيىرما جىلعا جۋىق. قاتارداعى ءورت سوندىرۋشىدەن باستاعان ول بۇگىندە توتەنشە جاعدايلاردى جويۋ ءبولىمىنىڭ باستىعى، پودپولكوۆنيك شەنىندە. ايتۋىنشا، كوللەكتسياسىنداعى بۇيىمداردىڭ ءبارى دە ول ءۇشىن قىمبات، دەگەنمەن، اراسىندا جانىنا ىستىق بىرەۋى بار ەكەن.

«مىناۋ - مەنىڭ جاۋىنگەرلىك كاسكام. بۇل باس كيىمدى ءۇش جىل كيدىم. ونىمەن تالاي ادامنىڭ ءومىرىن ولىمنەن اراشالاپ قالدىم. ءورت ءسوندىرۋ كەزىندە ءتۇرلى جاعدايلار بولىپ جاتادى، باسقا بورەنە قۇلاپ نەمەسە گاز باللونى جارىلعان كەزدەر دە بولدى. ول دا مەنى تالاي ساقتاپ قالدى»، - دەيدى بولاتجان اسقاربەكوۆ.

بولاتجان ەدۋارد ۇلىنىڭ كوللەكسيا جيناۋمەن اينالىسقانىنا بيىل 8 جىل. ءتۇرلى كاسكالاردان باسقا جۇزگە جاقىن شيەۆرون، ماگنيت، قالامساپ، جيناق ساندىقشا رەتىندە جاسالعان كادەسىيلار توپتاماسى بار. ونىڭ ەرمەگىن بىلەتىن دوستارى مەن تانىستارى بارعان جەرلەرىنەن ءورت سوندىرۋگە قاتىستى سىيلىق- بۇيىمداردى اكەلۋدى داستۇرگە اينالدىرىپتى.