اقسەلەۋدىڭ سوڭعى قولتاڭباسى

بىزگە ابەكەڭنىڭ: «ءاي، نازاربەكوۆ! سەن اقىن ەكەنسىڭ عوي!» - دەگەن ءبىر اۋىز ءسوزى ەرەكشە قۋات بەرىپ، شىعارماشىلىق جۇمىسقا ىنتىق ەتكەن بولاتىن. سودان بەرى جيىرما جىلدان اسسا، ءبىزدىڭ جاس جەتپىستەن اسىپتى. وسى ۋاقىت ىشىندە وزىمىزشە قالىپتاستىق. جازاتىن تاقىرىبىمىز دا انىقتالعان سەكىلدى.

مەنىڭ وسى ۋاقىتقا دەيىنگى شىعارماشىلىق تالپىنىسىما ابەكەڭ سەكىلدى قازاق ادەبيەتىنىڭ ءبىر الىبى اسەر ەتسە، ەندىگى قالعان عۇمىرداعى جازىلار شىعارمالارىمنىڭ بولمىسىنا تاعى ءبىر الىپ قازاقتىڭ، اقسەلەۋ سەيدىمبەك دوسىمنىڭ ءبىر شىعارماما «اسەرىم» دەپ جازعان پىكىرىنىڭ ۇلكەن ىقپالى بولعان سەكىلدى.

العاشقى ولەڭىن جاسى ەلۋگە تاقاپ بارىپ جازعان كىسىنىڭ كوبىنە ءومىر تۋرالى، تۋعان جەر تاعدىرى تۋرالى تولعانىستا بولۋى زاڭدى نارسە. ءبىز جوعارىدا قالىپتاستىق دەگەندە ايتپاعىمىز وسى بولاتىن. ءبىزدىڭ شىعارماشىلىعىمىزداعى وسى جاعدايىمىزدى مارقۇم اقاڭ ءدال تاۋىپ تانىعان سەكىلدى.

09.09.09 كۇنى تاڭ الدىندا سوڭعى نۇكتەسىن قويعان تۋعان جەر تاعدىرى تۋرالى تولعانىستان تۋعان ءبىر ەڭبەگىمە پوەما دەپ ايدار تاعىپ «ساعىنىش» اتاندىرعان ەدىم. سول كۇنى جازۋشىلار قويشىعارا، اقسەلەۋ، كەنجەعالي جانە ساماتبەك بوكەباي باستاعان ءبىر توپ ساۋلەتشىلەر، ءارى سول ەكى وداققا دا مۇشە مەن، سايىن نازاربەك ۇلى، ءبىر ادەمى كەش ۇيىمداستىردىق. كەشىمىزدىڭ اتى «قويشىعارا سالعارا ۇلىنىڭ جەتپىسىنە قۇرمەت» دەپ اتالىپ ەدى.

بارلىعى ون بەس كىسى بيليارد جارىسىن وتكىزدىك. ءبىرىنشى ورىنعا قويشەكەڭ مەن اقاڭ بىردەي ۇپاي الىپ شىقتى. ءبىراق وسىعان دەيىنگى ءبىر كەشىمىزدىڭ جەڭىمپازى اتانعان قويشەكەڭە ول ورىندى تاعى بەرۋگە «كوپسىنىپ» كەشتى ۇيىمداستىرۋشى ساۋلەتشى جىگىتتەر «اقاڭ - جەڭىمپاز» اتاعىن بەردى. مەن سول كەشتە اقاڭ مەن قويشەكەمە «سىياسى كەپپەگەن» «ساعىنىش» اتتى شىعارمامدى سىيلاپ ەدىم.

«سۇم تاعدىر- اي» دەپ ادامداردىڭ تورىعاتىنى وسىدان شىعار، سودان ءدال ءبىر جەتى وتكەندە 15.09.09 كۇنى تاڭ الدىندا تاس توبەمىزدەن نايزاعاي ءتۇسىپ ەدى. اقاڭا ۋاقىت بولعانى تۋرالى حابار جەتتى دە، ءبىز اقاڭدى جوقتاپ، ەسىگىنىڭ الدىندا تۇردىق. سۇيەك سىرقىراتار سۋىق كۇن ەدى.

... سول قارالى كۇننەن ءبىر ايداي مەزگىل وتكەندە، قازان ايىنىڭ باس جاعىندا، اقاڭنىڭ قىزى تەلەفون سوقتى. «پاپام ءسىزدىڭ پوەماڭىزعا پىكىر جازىپ كەتىپتى. الىپ كەتىڭىز» - دەدى.

الدىم. ۇيىمە كەلگەنشە اشىپ قاراۋعا، اقاڭ پىكىرىمەن تانىسۋعا باتىلىم بارمادى. اقاڭ پىكىرى مەنىڭ شىعارماشىلىق ەڭبەگىم ءۇشىن بولاشاق تاعدىرىم سەكىلدى ەدى...

... قولىمدا ەكى بەتىنە دە اق قاعاز سالىنعان فايل. فايلدىڭ ورتاسىنداعى قاعازدى سۋىرىپ السام، اقسەلەۋ پىكىرى... ءبىراق باتىلىم جەتىڭكىرەمەي وتىر. ءبىر ۇيدە جالعىز ءوزىم. شاي قويدىم. ءبىر شىنى شايدان ءبىر ۇرتتاپ بارىپ فايلعا سالىنعان قاعازداردى سۋىرىپ الدىم. وتكەن جەتىدە ءوزىم بەرگەن پوەمام ەكەن. ءبىرىنشى بەتتىڭ وڭ جاق اشىق جاعىنا كولدەنەڭ جولدارمەن پىكىرىن جازىپتى.

«اسەرىم» دەپ باستاپتى. مارجانداي سۇلۋ ارىپتەر. مونشاقتاي بوپ تىزىلگەن جولدار. وقىپ قاراپ جۇرەگىم سوعىپ كەتتى.

ءبىراز ويلانىپ بارىپ قايتا وقىدىم.

اسەرىم

ەل، جەر، ساعىنىش، كيە، قاسيەت، پاراسات جانە وسىنىڭ بارىنە ازاماتتىق ورەدەگى الاڭ كوڭىل... مىنە، ناعىز ونەردى دۇنيەگە كەلتىرەتىن قۇدىرەتتەر وسىلار بولسا كەرەك. سايىن- دوستىڭ جان- جۇرەگى وسى قۇدىرەتتەرگە شۇپىلدەپ تولىپ تۇر. سول قۇدىرەتتەر شىنشىل سەزىم، شىنايى سۋرەت، شىمىر وي بولىپ حاتقا تۇسكەن. مەن مۇنى پوەما ەمەس، تولعاۋ - جان- جۇرەكتىڭ تولعاۋى دەر ەدىم. اقيقاتى دا سول.

اقسەلەۋ. 15.09.09.

كوزىم «اقسەلەۋ. 15.09.09» دەگەن جازۋعا توقتاعان ساتتە جۇرەگىم ءدىر ەتە ءتۇستى. بۇل احاڭنىڭ قايتىس بولعان كۇنى. سول كۇنى تاڭ الدىندا 15.09.09 كۇنى ءبىز اقسەلەۋدى جوقتاپ، ەسىگىنىڭ الدىندا تۇرعان ەدىك قوي...

سوندا اقسەلەۋ- دوستىڭ ەڭ سوڭعى اق قاعازعا تۇسىرگەن ارىپتەرى ماعان ارنالعانى ما!..

سولاي بولىپتى...

مەن ءۇشىن مەنىڭ قالعان عۇمىرىمنىڭ ءمان- ماعىناسىن انىقتاپ بەرەر سويلەمدەرگە اينالىپتى...

سول كەزدە جارالى جۇرەكتى ناعىز ساعىنىش، اقسەلەۋگە دەگەن ساعىنىش ەلجىرەتىپ بارا جاتتى.

تەلەفونمەن قوشەكەڭە (قويشىعارا) وقىپ بەردىم دە، ساندىق تۇبىنە، تەرەڭدەۋ تۇبىنە جاسىردىم.

بۇگىن 15.02.2010 ەكەن. ءدال بەس اي ءوتىپتى...

جۇرەك جاراسى قابىقتانا باستاعانداي. اقسەلەۋ «اسەرىن» قايتا وقىپ وتىرمىن. ەندى بۇل سوزدەر ماعان اقسەلەۋگە دەگەن ايانىش سەزىمدەرىمەن قوسا شىعارماما دەگەن ماقتانىش سەزىمىن وياتا باستاعانداي. «پوەما» دەگەن ءسوزدى «تولعاۋ» دەگەن سوزگە اۋىستىرىپ الىپ، قايتا وقىپ شىقتىم.



سايىن نازاربەك ۇلى

https://adebiportal.kz