جۇمىس مادەنيەتىن وزگەرتۋىمىز كەرەك پە؟

بۇل جۇمىس مادەنيەتىن وزگەرتەتىن كەز كەلگەنىن بىلدىرە مە؟ ВВС باسىلىمىندا «ەڭبەك قۋانىشى» كىتابىنىڭ اۆتورى بريۋس دەيسليدىڭ ماقالاسى جارىق كوردى. وندا اۆتور ادامدار ۇزدىكسىز كەزدەسۋلەر مەن قاربالاستىڭ ىشىندە ءجۇرىپ ءوز اتىن ۇمىتۋعا شاق قالعانىن جازعان.

«مەن كىتاپ جازۋ ءۇشىن ەكى جىل ىزدەنىپ، جۇمىس ورىندارىنداعى مادەنيەتتى وزگەرتۋ كەرەكتىگىنە كوز جەتكىزدىم. پسيحيكالىق دەنساۋلىق قورىنىڭ مالىمەتتەرىنە سەنسەك، بىلتىر بريتان حالقىنىڭ %74 جۇمىس كەسىرىنەن سترەسسكە شالدىققان. بۇعان تاڭعالۋعا بولمايدى. سەبەبى بۇگىندە بارلىعىمىز جۇمىس بابىمەن كەلەتىن ەلەكتروندى حاتتاردى قولىمىزداعى تەلەفونعا قابىلدايتىن بولعانبىز. زەرتتەۋلەرگە سەنسەك، ارىپتەستەرىمەن ۇنەمى بايلانىستا بولۋى كەرەك ادامدار اپتاسىنا جەتپىس ساعاتتان ارتىق جۇمىس ىستەيدى»، دەپ جازادى اۆتور.

ونىڭ ايتۋىنشا، بۇگىندە جۇمىستى نەلىكتەن ىستەپ جاتقانىمىزعا ەمەس، قالاي ىستەپ جاتقانىمىزعا ءمان بەرۋ كەرەك.

«جۇمىس مادەنيەتىن بىرەۋ كەلىپ وزگەرتىپ بەرمەيدى. ءبىز ءوزىمىز وزگەرتۋ كەرەكپىز. جۇمىس كۇنىنىڭ ديزاينىن وزگەرتۋ جۇمىستان شارشاماۋعا اسەر ەتەدى. مىسالى، كوپشىلىگىمىز جينالىستاردى ۇناتپايتىنىمىز انىق جانە بۇل قىزمەتكەرلەردىڭ كوپ ۋاقىتىن الادى. سول سەبەپتى جينالىستارعا قاتىسۋشىلار سانىن ەكى ەسە ازايتىپ وتىرعان ءجون. سونىمەن قاتار جۇما كۇنى شارشاپ قالماس ءۇشىن دۇيسەنبىدەن باستاپ بەيسەنبىگە دەيىن تۇسكى اسقا ءۇزىلىس جاساعان ماڭىزدى. سونداي- اق جۇمىس اراسىندا ءۇزىلىس جاساپ، ارىپتەسىڭمەن كوفە ءىشىپ كەلگەننىڭ دە پايداسى زور. ال جاياۋ ءجۇرۋ شىعارماشىلىقتى %81-عا ارتتىرادى»، دەيدى اۆتور.

ونىڭ ايتۋىنشا، بۇگىنگى تاڭدا جۇمىسقا قاتىستى كوپ تالاپ ادامداردى قاربالاس تىرلىككە بويۇسىنۋعا ماجبۇرلەگەن.