ءبىلىم مينيسترلىگى بالالاردى ءبىر كۇندى ينتەرنەتسىز وتكىزۋگە شاقىرادى

«بۇگىنگى تاڭدا بالالاردىڭ سمارتفوننان نەمەسە پلانشەتتەن الشاقتاۋىنا كەلىسىم بەرمەۋى ءار اتا- اناعا تانىس جاعداي. «تاعى دا 5 مينۋت، سوسىن بولدى»، «مەن جاڭا عانا الدىم عوي» سياقتى سوزدەر كۇندەلىكتى قالىپتى قۇبىلىسقا اينالدى. دۇنيەجۇزىلىك ستاتيستيكا بويىنشا، حالىقتىڭ شامامەن 50 پايىزى قانداي دا ءبىر الەۋمەتتىك جەلىدە، ال كەيبىرەۋلەرى ءتىپتى بىردەن بارلىق الەۋمەتتىك جەلىلەرگە تىركەلگەن»، - دەلىنگەن مينيسترلىكتىڭ باسپا ءسوز حابارلاماسىندا.

ينتەرنەتكە تاۋەلدىلىكتىڭ الدىن الۋ، كامەلەتكە تولماعانداردىڭ ينتەرنەتتەگى بەلسەندىلىگىن باقىلاۋ، ەرەسەك ينتەرنەت- قىزمەتتەردى پايدالانۋشىلاردىڭ جاۋاپكەرشىلىگىن، ينتەرنەت پايدالانۋ مادەنيەتىن ارتتىرۋ ماقساتىندا قازاقستان رەسپۋبليكاسى ءبىلىم جانە عىلىم مينيسترلىگى 2019 -جىلعى 27  - قاڭتار - حالىقارالىق ينتەرنەتسىز كۇنىنە وراي «مەن OFFLINE» رەسپۋبليكالىق كەڭ اۋقىمدى بالالار اكسياسىن وتكىزەدى.

«اتالعان ءىس- شارا وقۋشىلاردى سمارتفوننان، كومپيۋتەردەن جانە جاھاندىق جەلىدەن الشاقتاتۋ، بۇل كۇندى تەك قانا شىنايى الەمدە ءومىر سۇرۋگە، جاقىن ادامدارمەن قارىم- قاتىناس جاساۋعا نەمەسە ونى سۇيىكتى حوببيىنە ارناۋعا كومەكتەسەدى»، - دەپ حابارلايدى مينيسترلىكتەن.

اكسيامەن رەسپۋبليكاداعى بارلىق 1-11 - سىنىپ وقۋشىلارىن قامتۋ جوسپارلانىپ وتىر. وبلىستاردىڭ، استانا، الماتى جانە شىمكەنت قالالارىنىڭ ءبىلىم باسقارمالارى 1-4 - سىنىپتارعا ارنالعان «ينتەرنەتسىز كۇندى قالاي وتكىزدىم» اتتى سۋرەت بايقاۋىن، 5-11 - سىنىپ وقۋشىلارىنا ارنالعان «مەن OFFLINE» ەسسە بايقاۋىن ۇيىمداستىرادى. جۇمىستار قازاقستان رەسپۋبليكاسى ءبىلىم جانە عىلىم مينيسترلىگى بالالاردىڭ قۇقىقتارىن قورعاۋ كوميتەتىنىڭ Facebook-تەگى رەسمي پاراقشاسىندا جاريالانادى.

اۆتور: ايان بەكەن ۇلى