قاراعاندىداعى توبەلەس: قاشىپ كەتكەن ارمەنيا ازاماتىنا قاتىستى جاڭا دەرەك شىقتى

جاس جىگىتتىڭ قالاي ۇستالعانىن ارمەنيانىڭ رەسەيدەگى ەلشىلىگى ايتىپ بەردى دەپ حابارلايدى Sputnik قازاقستان.

بۇعان دەيىن پاۆلودار وبلىسى ارقىلى شەكارا اسقان نارەك گۋگۋريان رەسەيدە تۋىستارىنىڭ ۇيىندە بولعان جانە پوليتسياعا ءوزى بەرىلگەن.

«گۋرۋريان كەشكە ومبى قالاسىنىڭ قۇقىق قورعاۋ ورگاندارىنا ءوزى كەلدى»، - دەپ Sputnik ارمەنيا ەلشىلىكتىڭ تۇسىنىكتەمەسىنەن ءۇزىندى كەلتىرگەن.

ەسكە سالا كەتەيىك، ەلدى ءدۇر سىلكىندىرگەن وقيعا 31-جەلتوقساننان 1- قاڭتارعا قاراعان ءتۇنى تاڭعى تورتتەر شاماسىندا قاراعاندىداعى «دريەۆني ريم» مەيرامحاناسىندا بولدى.

مەيرامحاناعا جاڭا جىلدى قارسى الۋعا كەلگەندەر مەن پەرسونال اراسىندا جانجال شىعىپ، سوڭى جاپپاي توبەلەسكە ۇلاسقان.

سالدارىنان ءتورت ادام پىشاق جاراقاتىن الىپ، ءبىر جىگىت كوز جۇمدى.

پوليتسيا بۇزاقىلىق ارەكەتتەرى ءۇشىن جانە 23 جاستاعى جىگىتتىڭ ولىمىنە كۇدىكتى رەتىندە 8 ادامدى ۇستاپ، قامادى.

كۇدىكتىلەردىڭ ءبىرى ارمەنيا ازاماتى نارەك گۋرۋريانعا حالىقارالىق ىزدەۋ جاريالاندى.

ول 1- قاڭتار كۇنى كەشكى 22:00 دەن كەيىن پاۆلودار وبلىسىنداعى بەكەت ارقىلى رەسەي اۋماعىنا ءوتىپ كەتكەن.

7- قاڭتار كۇنى 21 جاستاعى كۇدىكتى جەلىدە بەينەۇندەۋ جاريالادى.

وندا گۋرۋريان قازاقستان بيلىگىنە بەرىلۋگە دايىن ەكەنىن مالىمدەپ، ادام ولىمىنە قاتىسى بارىن جوققا شىعارعان بولاتىن.

سونداي-اق 9-قاڭتار كۇنى گۋگۋريان رەسەيدە قولعا ءتۇستى.