بەلگىلى قازاقستاندىق جۋرناليست ا ق ش- قا قونىس اۋداردى

ءوز سوزىندە عالىم بوقاش سوڭعى 9 جىلعا جۋىق ۋاقىت كولەمىندە پراگاداعى حالىقارالىق مەديا كومپانيادا جۇمىس ىستەپ، ءبىلىمى مەن تاجىريبەسىن ءبولىسىپ، ءوزىنىڭ كوپ دۇنيەنى ۇيرەنگەنىن، ەلدە ءسوز بوستاندىعى مەن مۋلتيمەديا جۋرناليستيكا ۇلگىلەرىن ناسيحاتتاۋ ءۇشىن ءبىراز كۇش سالعانىن اتاپ ءوتتى. وقىعان- توقىعانىمدى قازاقستاندا قىزمەتتە جۇرگەنىمدە كوپتىڭ پايداسىنا جاراتۋعا تىرىستىم، دەيدى ول.

«ەندى وتباسىمنىڭ جاعدايى، بولاشاق زەرتتەۋ جۇمىسى مەن قىزمەت ىڭعايىنا وراي ا ق ش- قا قونىس اۋدارىپ بارا جاتىرمىن. بۇرىلىپ سوڭىما كوز سالسام، باعىپ- قاققان اكە- شەشەمنىڭ، قۇلدىراڭداپ قاسىمدا وسكەن قارىنداسىمنىڭ، ءتاڭىر تاعالا ۇزەڭگى جولداس قىلعان نەبىر جاقسى مەن جايساڭنىڭ ءجۇزىن كورەم، دەمەۋىن سەزەم، دۇعا- تىلەگىن ەستيمىن. دۇنيەدەن وزعاندارىن دۇعامنان قالدىرمايمىن. سوڭعى بىرنەشە اپتا بويى قيماي قوشتاسىپ، جۇرەكجاردى سوزدەرىن ايتىپ جاتقان استانا، الماتى مەن پراگاداعى ارىپتەستەرىمە العىسىم زور، قۇرمەتىم ەرەكشە. جاقسىلىققا ءھام جارىققا ۇمتىلۋىما سەبەپ بولعان وسىنداي ءبىر تۋماسا دا، جانى تۋىس بولىپ كەتكەن جاقسى ءھام جارىق جاندار ەكەنىن بىلەم، ۇمىتپايمىن، قادىر تۇتام، شەكسىز سۇيەم. قۇداي قوسقان جارىمنىڭ كوڭىلىن ءبۇتىن ەتىپ، قوس قىزىمنىڭ ءبىلىمىن ۇشتاپ، دەنساۋلىعىن ساقايتۋ ءۇشىن وسىنداي شەشىم قىلۋعا تۋرا كەلدى» ، - دەپ جازدى جۋرناليست Facebook جەلىسىندە.

سونىمەن قاتار ول قاي ەلدە جۇرسە دە، قازاق تىلىندەگى اقپارات پەن مادەني كەڭىستىكتىڭ اجىراماس بولشەگى بولىپ قالا بەرەتىنىن جانە سول كەڭىستىكتى دامىتىپ، كەڭەيتۋگە ۇلەس قوسا بەرەتىنىن جەتكىزدى.