بالكوندا وتشاشۋ اتپاق بولعان اقتوبەلىك اۋرۋحاناعا ءتۇستى

اقتوبەدە مەرەكە كۇنى جەدەل جاردەم قىزمەتىنە جۇگىنگەندەر از بولمادى. 31- جەلتوقسان كۇنى ساعات 18:00 مەن 1- قاڭتاردا ساعات 8:00 گە دەيىن قالا تۇرعىندارىنان 400 دەن استام شاقىرۋ كەلىپ ءتۇستى.

جەدەل جاردەم بريگاداسى 383 جەرگە بارسا، ديسپەتچەرلەر 18 شاقىرتۋعا تەلەفون ارقىلى كەڭەس بەردى. كوبىنىڭ قان قىسىمى، ال بالالاردىڭ دەنە قىزۋى كوتەرىلدى. جۇرەگى اۋىرعان 6 ادام شۇعىل جانساقتاۋ بولىمىنە جەتكىزىلىپ، جاتقىزىلدى.

جاڭا جىل ءتۇنى ءتۇرلى وتشاشۋدان جاراقات العاندار دا تىركەلدى. دارىگەرلەر وسىنداي وقيعا بولعان 15 جەرگە باردى.

«ساعات تۇنگى 12 دەن 21 مينۋت وتكەندە وتشاشۋدان زاقىم العان ادامعا كومەك سۇرالدى. جەدەل جاردەم شاقىرتۋعا 9 مينۋتتا جەتتى. 30 جاستاعى اقتوبەلىك بالكوندا وتشاشۋ اتپاق بولعان. ءبىراق ۇلگەرمەي، پەتارد قولىندا جارىلىپ كەتكەن. ول بىردەن وبلىستىق جەدەل جاردەم اۋرۋحاناسىنا ءتۇستى. جاعدايى اۋىر. ونىڭ وڭ جاق قولىنىڭ ەتى جىرتىلىپ، ساۋساعى زاقىمداندى. ناۋقاس تراۆماتيكالىق شوك الدى»، - دەپ حابارلادى اقتوبە وبلىستىق دەنساۋلىق ساقتاۋ باسقارماسىنىڭ وكىلى.