قىتاي الداعى جىلعا دامۋدىڭ ءۇش باعىتىن انىقتادى

 ايتالىق، قىتاي الداعى جىلى دامۋىن باسەڭدەتپەۋ ءۇشىن ناقتى جوسپار قۇرىپ، باسىم ءۇش باعىتتى تاڭداپ الدى، دەپ حابارلايدى «حابار 24» ءتىلشىسى.

 2019 -جىلى قىتاي بيلىگى نەگىزگى 3 مىندەتتى جۇزەگە اسىرادى. ءبىرىنشىسى، تۇراقتىلىقتى ساقتاي وتىرىپ العا ىلگەرىلەۋ. مەملەكەت سىرتقى جاعدايلارعا قاراماستان دامۋ قارقىنىن توقتاتپايدى. تاۋكەلدى باقىلاۋ، كەدەيلىكتى ازايتۋ جانە قورشاعان ورتانىڭ لاستانۋىمەن كۇرەسۋدە وڭدى وزگەرىستەر بار.

كوممۋنيستىك پارتيانىڭ وتىرىسىندا حالىقتى جۇمىسپەن قامتۋ، قارجى نارىقتارى، سىرتقى ساۋدا، شەتەلدىك جانە ىشكى ينۆەستيتسيا سالاسىنداعى جاعدايلاردى تۇراقتاندىرۋ بويىنشا ۇسىنىستار ايتىلدى. ال عالامدىق ساۋدا قايشىلىقتارى مەن تۇراقسىزدىق جاعدايىندا ۇلتتىق ەكونوميكانىڭ ءوسىمىن ساقتاۋ نەگىزگى مىندەتتىڭ ءبىرى بولىپ قالادى.

 ليۋ ين، قىتاي حالىق ۋنيۆەرسيتەتى قارجىلىق زەرتتەۋ ينستيتۋتىنىڭ ساراپشىسى:

 - 2019 -جىلى دا قىتاي ەكونوميكاسىنا سىرتقى جانە ىشكى فاكتورلار اسەر ەتەدى دەپ ويلايمىن. وعان الەمدەگى ۆاليۋتا ساياساتى، ساۋدا پروتەكتسيونيزمى قىسىم تۇسىرەدى. ا ق ش فەدەرالدى رەزەرۆ جۇيەسى دوللار مولشەرلەمەسىن تاعى كوتەرۋى مۇمكىن. سوندىقتان دوللاردىڭ قىمباتتاۋى دامۋشى مەملەكەتتەردىڭ ەكونوميكاسىنا، سونىڭ ىشىندە قىتايدىڭ قارجى نارىعىنا دا بەلگىلى ءبىر دەڭگەيدە اسەر ەتەدى. ماسەلەن، بيىل ساۋدا پروتەكتسيانيزمى ساياساتىنىڭ كەسىرىنەن ترانسشەكارالىق ينۆەستيتسيالار كولەمى 2018 -جىلدىڭ ءبىرىنشى جارتى جىلدىعىندا 40 پروتسەنتكە ءتۇسىپ كەتتى.

ساراپشى ليۋ يننىڭ ايتۋىنشا، وسى سىرتقى فاكتوردىڭ اسەرىنەن كەلەر جىلى دا قىتايلىق تاۋارعا دەگەن سۇرانىسىن ازايتىپ، ەكونوميكاعا قىسىم ءتۇسۋى مۇمكىن. سوندىقتان قىتاي ىشكى تۇتىنۋ رەفورماسىنا باسىمدىق بەرەدى. بۇل دەگەنىمىز بۇرىنعى تەز قارقىندى دامۋدان، باياۋ ءارى ساپالى دامۋ جولىن ودان ءارى جالعاستىرادى. تاياۋدا وتكەن ورتالىق ەكونوميكالىق جۇمىس وتىرىسىندا رەسمي بەيجىڭ بىرنەشە باعىتقا باسىمدىق بەرەتىنىن ايتتى. ماكروەكونوميكا، مونەتارلى ساياسات، سالىق ساياساتىندا بىرنەشە شارا قابىلدادى. ماسەلەن، ەلدەگى سالىقتاردى ودان ءارى قىسقارتۋدى جوسپارلاپ وتىر.

 اۆتورلارى: نۇربەك بەكەن، جاڭ ءسۇي

www.24.kz